پڕۆژەیێ جادەیێن ناڤخۆیـی ل ناوچەدارییا گردەسێن دهێتە بجهئینان
رەمەزان زەكەریا:
ل ژێر سەرپەرشتیا ڕێڤەبەریا گشتی یا باژێڕڤانیان ل پارێزگەها دهۆكێ، پڕۆژەیێ چێكرنا ڕێكێن ناڤخۆیی ل سەنتەرێ ناوچەداریا گردەسێن ب شێوەیەكێ ڕاستەوخۆ كەفتە د قووناغا بجهئینانێ دا.
سەربەست سەبری، رێڤەبەرێ ناوچەدارییا گردەسێن بۆ ئەڤرۆ گۆت: «ئەڤ پڕۆژەیێ خزمەتگوزاری ب تەمامی ل سەر بودجە و داهاتێ باژێرڤانیێ ب ڕێژەیا %100 دهێتە پارەداركرن و بجهئینان».
ئاشكرا ژی كر، ئارمانجا وان یا سەرەكی ژ پڕۆژەی، باشتركرنا تۆڕا ڕێك و جادەیێن ناڤخۆیی و پێشكێشكرنا خزمەتگوزاریێن پتر و باشترە بۆ ئاكنجیێن سەنتەرێ ناوچەداریێ و رزگاركرنا وانە ژ گرفتێن هاتنوچوونێ.
ناڤبری گۆت ژی: «كارێن پڕۆژەیێ ل سەنتەرێ ناوچەداریێ دەستپێكرینە و دێ هەموو بزاڤەك بۆ وێ چەندێ بیت، كو ب كوالیتەكا بلند و د زووترین دەم دا بۆ خزمەتا وەلاتیێن دەڤەرێ ب دووماهی بهێت».
