ئیرانێ پێدڤی ب چاکسازیێن مەزن هەیە
چەند رۆژن بەحسێ ڤێ یەکێ دهێتە کرن کو مەسعود پزیشکیان سەرۆک کۆمارێ ئیرانێ نامەیا دەست ژ کارکێشانا خوە رادەستی نڤیسینگەها رێبەرێ ئیرانێ کریە و د نامەیا خوە دا ئاماژە ب ڤێ یەکێ کریە کو، کەسێن توندرەو یێن سەر ب سوپایێ پاسداران بەردەوام دەستێوەردانێ د کاروبارێن دەولەتێ دا دکەن و رێ نادەن دەولەت وەکو پێدڤی خزمەتا خەلکی بکەت.
هندەک ژ دەزگەهێن راگەهاندنا ئیرانێ ئەو یەک ژی دیار کرینە، سەرۆک کۆمارێ ئیرانێ دیار کریە رەوشا ئیرانێ گەلەک خرابە و دڤێت چاکسازیێن مەزن بهێنە کرن، هەکە ئەو یەک نەهێتە کرن دێ رەوش گەلەک خرابتر لێ هێت و دڤێت رێگری ل وان کەسان ژی بهێتە کرن یێن بەردەوام ئاستەنگان ل هەمبەر کاروبارێن دەولەتێ دروست دکەن.
ئەو یەک د دەمەکێ دایە کو بەری نها ژی چەندین جاران سەرۆک کۆمارێ ئیرانێ دیار کریە، پێدڤیە چاکسازیێن مەزن بهێنە کرن دا ئەو وەکو دەولەت بشێن ئاریشەیێن هەی چارەسەر بکەن.
