ڕێبەر ئەحمەد: داعش دەرفەتێ ژ ڤالاهییێن ئەمنی وەردگریت
وەزیرێ ناڤخوە یێ حوكمەتا هەرێما كوردستانێ د داخویانییەكا ڕۆژنامەڤانیدا ڕۆناهی ئێخستە سەر كۆمەكا پرس و بابەتێن گرنگ یێن گرێدای ب ئاسایشا هەرێمێ، مەترسییێن داعشێ، پەیوەندییێن هەولێرێ و بەغدایێ، و هەلوەستێ هەرێمێ بەرامبەر كابینەیا نوو یا حوكمەتا فیدرال.
ڕێبەر ئەحمەد، وەزیرێ ناڤخوە یێ هەرێما كوردستانێ ئاماژە ب وێ چەندێ كر، دەمەكێ درێژە ب درۆن و مووشەكان هێرش دهێنە كرن سەر هەرێما كوردستانێ و گۆت: بێگومان بەهانەیێن جودا هەبوون، لێ هەرێما كوردستانێ بەردەوام جهەكێ ئارام و پەناگەهەك بوویە بۆ هەر كەسەكێ كو پێدڤی ب پاراستنێ بووبیت. هەلوەستێ مە یێ ڕۆهنە كو ئەم نابینە پشكەك ژ ئاریشەیێن دەڤەرێ و هیڤیدارین هەموو ئالی ڕێزێ ل ڤی هەلوەستی بگرن، چونكی چ بەهانە بۆ ب ئارمانجگرتنا هەرێمێ نینن.
دەربارەی گەفێن ڕێكخراوا تیرۆرستییا داعشێ، وەزیری ناڤخوە ڕاگەهاند: پێزانینێن هەواڵگری هەبوونا ڕێکخراوا تیرۆریستی یا داعشێ ل دەڤەرێ پشتڕاست دكەن و گۆت: ئەوێن دبێژن داعش ب دووماهی هاتییە وەسا نینە، بەلكو ڕۆژانە چالاكییێن وان هەنە و قوربانی ژێ پەیدا دبن، د بەرامبەردا ژی هێزێن ئەمنی یێن ئیراقێ و هەرێمێ د بەردەوامن د ڕووبڕووبوونا واندا.
دەربارەی ڤالاهییێن ئەمنی، ڕێبەر ئەحمەدی ل سەر وێ چەندێ كر، سەرەڕای وێ چەندێ كو د سالێن بۆریدا ب هەماهەنگی ل گەل بەغدایێ دوو لیوایێن هەڤپشك بۆ تژیكرنا وان ڤالاهییان هاتینە پێكهینان، لێ ئەو هێزە تێرا ناكەت و پێدڤییە لیوایێن هەڤپشك یێن زێدەتر بۆ پاراستنا دەڤەران بهێنە پێكهینان.
وەزیرێ ناڤخوە باسێ كۆمبوونێن بەردەوام یێن د ناڤبەرا هەولێرێ و بەغدایێ دا د بیاڤێن سیاسی، ئابۆری و ئەمنی دا و گۆت: ب تایبەتی پشتی ڤەكێشانا هێزێن هەڤپەیمانان، پێدڤییەكا مەزن هەیە كو هێزێن هەرێمێ و فیدرال هەماهەنگییێن خوە د لێكگۆهارتنا پێزانینان، چالاكیێن هەڤپشك و داڕشتنا ستراتیژیێ دا زێدەتر بكەن. مەرجەعێ مە هەموویان ژی بۆ چارەسەركرنا هەموو ئاریشەیان، دەستوورێ بەردەوام یێ ئیراقێ یە.
د پشكەكا دی یا ئاخڤتنێن خوەدا، وەزیرێ ناڤخوە پشتەڤانییا هەرێما كوردستانێ بۆ حوكمەتا عەلی زەیدی دووپات كر و گۆت: هەلوەستێ مە ل هەرێمێ پشتەڤانیكرنا ڤێ كابینەیێ یە دا كو بەرنامەیێ وێ سەركەڤیت، چونكی سەركەفتنا بەرنامەیێ وێ دێ بیتە ئەگەرێ ئیراقەكا ئارامتر. ل گەل وەزیرێ ناڤخوە یێ نوو ل ئیراقێ ژی كو نوو دەستبكار بوویە دێ پەیوەندییێن مە هەبن و هەماهەنگییێن مە یێن ئەمنی دێ د بەردەوام بن.
د بەرسڤا پرسیارەكێ دا دەربارەی كۆمبوون و ڕێككەفتنا ئەمنی یا د ناڤبەرا ئیراقێ و ئیرانێ دا، وەزیرێ ناڤخوە ب راگەهاند: ئەم د وێ كۆمبوونا بەغدایێ دا پشكدار نەبووین، لەوما داخۆیانیێ ل سەر كۆمبوونەكێ نادەم كو ئەم تێدا بەرهەڤ نەبووبین.
