هەتا ئێك ڕەڤاندی ددەستێ داعشێ دا مابیت د لێگەڕیانێ دا دێ بەردەوام بین
د ڕێورەسمێن ڕاگەهاندنا تۆڕا «هەستانەوە» بۆ ڕزگاربوویێن دەستێ داعشێ دا، پەیڤدارێ سەرۆكاتییا هەرێما كوردستانێ ب نوونەراتییا نێچیرڤان بارزانی، سەرۆكێ هەرێما كوردستانێ ڕاگەهاند، هەتا ئێك كەسێ ڕەڤاندی مابیت، نڤیسینگەها وان د هاریكاریكرن، ڕزگاركرن و لێگەڕیانێ ل دووڤ چارەنڤیسێ وان دا دێ یا بەردەوام بیت.
ڕۆژا چارشەمبی 21ێ چریا ئێكێ 2026، دلشاد شەهاب، پەیڤدارێ سەرۆكاتییا هەرێما كوردستانێ پشكداری د ڕێورەسمێن ڕاگەهاندنا تۆڕا «هەستانەوە» دا بۆ ڕزگاربوویێن دەستێ داعشێ كر، و د پەیڤەكێ دا ب نوونەراتییا نێچیرڤان بارزانی، سەرۆكێ هەرێما كوردستانێ، ڕاگەهاند»ئەم هاریكاری و پشەڤانییا هەموو وان پێكهاتەیان دكەین ئەوێن بووینە قوربانییێن دەستێ داعشێ. ڕاگەهاندنا ڤێ تۆڕێ دەربڕینا ئیرادەیێ یە و پێنگاڤەكا گرنگە بەر ب قووناغەكا نوو، تێدا ڕزگاربووی ب خوە ببنە خودان دەستپێشخەری، دەنگ و ڕۆلەكێ كاریگەر د پرسا ماف و پاشەڕۆژا خوە دا».
پەیڤدارێ سەرۆكاتییا هەرێما كوردستانێ باس ل بەردەوامییا پشتەڤانییان كر و ئاماژە ب وێ چەندێ دا»ئەركێ مەیە و هەردەم د ڕەوشێن دژوار دا مە پشتەڤانییا خوشك و برایێن خوە یێن ئێزدی كریە، ئەڤرۆ ژی دووپات دكەین كو ل كوردستانێ و ل ئیراقێ و ل هەر جهەكێ بیت، دێ هەردەم پشتەڤانێن مافێن وان یێن ڕەوا و پاراستنا ناسنامەیا وان بین».
د بەردەوامییا پەیڤا خوە دا دلشاد شەهاب گۆت»هەتا كەسەكێ ڕەڤاندی مابیت، نڤیسینگەها مە دێ یا بەردەوام بیت د ڕزگاركرنا وان دا و لێگەڕیانێ ل دووڤ چارەنڤیسێ وان».
دەربارەی پێنگاڤێن دادیێ و ئاڤەدانكرنا دەڤەرێن زیانڤێكەفتی، پەیڤدارێ سەرۆكاتییا هەرێما كوردستانێ گۆت»بجهئینانا دادیێ، مسۆگەركرنا مافێ ڕزگاربوویان، ئاشكراكرنا بەرزەبوویان، بجهئینانا یاسایا ڕزگاربوویێن ئێزدی، پەیداكرنا ڕەوشەكا گونجای بۆ زڤڕینا وان و ئاڤەدانكرنا شنگالێ و دەڤەرێن دی یێن ئێزدییان، كارێ سەرەكی و ئەركێ مەیە، دێ هەموو كارێن پێدڤی د وێ پێناڤێ دا ئەنجام دەین و چ خەمساریێ ناكەین».
د دووماهییا پەیڤا خوە دا، پەیڤدارێ سەرۆكاتییا هەرێما كوردستانێ دەستخوەشی ل وێرەكی و خۆڕاگرییا ڕزگاربوویان كر ژ پێخەمەت پێنگاڤهاڤێتن بەر ب پێشڤە، هەڤدەم هیڤیخواست كو ڕاگەهاندنا ڤێ تۆڕێ ببیتە دەستپێكا قووناغەكا نوو یا پڕ ژ ئومێد، كاركرن و ب دەستڤەئینانا دەستكەفتێن پتر بۆ ڕزگاربوویان.
