ئەحمەد كانی: پارتی كار ل سەر نەخشەڕێیا سەرۆك بارزانی دكەت
ئەندامەكێ كۆمیتەیا ناڤین یا پارتی دیموكراتی كوردستان ئاشكرا كر، سەرۆك بارزانی وەك مەرجەعێ كوردستانێ پێشنیازەك بۆ چارەسەركرنا ئاریشەیان و دەربازكرنا ڤێ قۆناغا هەرێما كوردستانێ تێدا دەرباز دبیت، پێشكێش كریە. ل هەموو پرسێن چارەنڤیسساز، نەتەوەیی و نیشتیمانی، سەرۆك بارزانی زێدەتر وەك مەرجەع سەرەدەری ل گەل ڤان پرسان كریە، نەك تنێ وەك سەرۆكێ پارتی دیموكراتی كوردستان، و دبێژیت: «پارتی نوكە یا كار ل سەر پێشنیازا سەرۆك بارزانی دكەت».
ئەحمەد كانی، ئەندامێ كۆمیتەیا ناڤین یا پارتی، بۆ رۆژنامەیا «ئەڤرۆ» دیار كر: «سەرۆك بارزانی بهەلكەفتا جەژنا قوربانی پەیامەك پێشكێشی ئالیێن سیاسی كربوو و تێدا پێشنیاز كربوو ئاریشەیێن ناڤخۆ بهێنە چارەسەركرن و دەست ژ هەڤڕكیێن بێ ئەنجام بەردەن. بێگومان سەرۆك بارزانی وەك مەرجەعێ كوردستانێ ئەڤ پێشنیازە كریە، ئالیێن سیاسی ژی هەروەكی مەرجەع سەرەدەری ل گەل پەیام و پێشنیازا وی كرینە، چونكە سەرۆك بارزانی بەردەوام دخوازیت بەرژەوەندیێن بەرتەنگ یێن حزبی نەبنە ئاستەنگ هەمبەر بەرژەوەندیێن گشتی یێن خەلكێ كوردستانێ. لەوڕا یا فەرە ئالیێن سیاسی، ب تایبەتی پارتی و ئێكەتی، ل سەر بنەمایێ پێشنیازا سەرۆك بارزانی بۆ چارەسەركرنا ڤێ قەیرانا سیاسی یا هەرێمێ كۆم ببن و هەر ئاریشەیەكا هەبیت ب رێیا ئاشتی و دانوستانان چارەسەر بكەن».
ئەڤی سەركردەیێ پارتی گۆت ژی: «پارتی نوكە یا كار ل سەر پێشنیازا سەرۆك بارزانی دكەت. بەری هەر ئالییەكێ سیاسی، ئەم وەكی پارتی دیموكراتی كوردستان دێ پێگیریێ ب بڕیار و رێنمایێن سەرۆك بارزانی كەین. ژ بەر كو چو بەدیل نینە، دووركەفتنا پارتی و ئێكەتیێ ژ هەڤدوو خزمەتا خەلكێ كوردستانێ ناكەت، بەرۆڤاژی دێ زیان بۆ پرۆسەیا سیاسی هەبیت».
ئەحمەد كانی ئاماژە كر: «كۆمبوونا چارشەمبیا بۆری یا سەرۆكایەتییا جڤاتا وەزیرێن هەرێما كوردستانێ و پشكدارییا پارتی و ئێكەتیێ د كۆمبوونێ دا، پێشهاتەكا باشە بۆ تەبایی ونێزیكبوونا هەردوو ئالییان، بەلێ پێدڤییە پێنگاڤێن باشتر بهێنە هاڤێتن».
خویاكر ژی»چو ژڤان بۆ كۆمبوونا پارتی و ئێكەتیێ نەهاتینە دیاركرن، بەلێ ئەز گەشبینم دێ هەردوو ئالی هەر كۆم بن، چونكە ژبلی كۆمبوون و رێكەفتنێ، چو بەدیل نینە بۆ رێڤەبرنا هەرێما كوردستانێ».
