ئەڤرۆ ئاكرێ چاڤ ل ناسناڤێ كۆپا كوردستانێ یە
رەمەزان زەكەریا
چاڤەرێ دهێتە كرن ئەڤرۆ ل دەمژمێر پێنجی ئێڤار یاریگەها زاخۆ یا نێڤدەولەتی مێڤاندارییا یارییا دووماهییا كۆپا كوردستانێ یا فوتبۆلێ بكەت ئەوا دێ دناڤبەرا یانەیا ئاكرێ هەلكرا ناسناڤێ خولا كوردستانێ یا ئەڤ سالە و یانەیا هندرین دا.
ل دۆر دووماهی بەرهەڤیێن تیما ئاكرێ ئەركان مەنسۆر ستێرێ تیمێ ئاشكراكر پشتی ناسناڤێ خولا نایابا كوردستانێ مە ب دەستڤەئینای ژلایێ دەروونی و جەستەیی ڤە پتر ئارام بوونە، نوكە یاریزان ئارامترن ژ یێن یانەیا هندرێن ئەڤەژی دێ مفای گەهینیت یاریزانێن مە ل ناڤ یاریگەهێ، هەروەسا یانەیا ئاكرێ خودانا باشترین جەماوەرە ئەڤە ژی هێزەكا مەزنە سەرەرای ئیدارەیەكا باش و كارگێریەكا باش و هەژی ب دەستڤەئینانا ناسناڤێ خولا نایابا كوردستانێ هێزەكا مەزن ب مە بەخشیە ب هیڤینە بۆ ب دەستڤەئینانا كۆپا كوردستانێ .
زێدەتر ناڤهاتی بۆ ئەڤرۆ گۆت: دەمێ شەش رۆژایە مە ب باشی خوە بەرهەڤكریە بۆ یاریا دووماهیا كۆپا كوردستانێ ل سەر یاریگەها زاخۆ ، ناسناڤێ خولا نایابا كوردستانێ خەونا مەبوو مە كرە راستی، پشتی ناسناڤێ خولا نایابا كوردستانێ نوكە خەونا مە كۆپا كوردستانێ یە ئەم دێ هەموو شیانێن خوە مەزێخین بۆ ب دەستڤەئینانا ناسناڤێ كۆپا كوردستانێ بۆ وێ چەندێ ئەڤسالە ئاكرێ هەموو ناسناڤا ب دەستڤە بینیت .
ناڤبری گۆتژی: ب دەستڤەئینانا ناسناڤێ كۆپا كوردستانێ بۆ یانەیا ئاكرێ نزیكترە ژ یانەیا هندرین، سەرەرای كو دهێتە چاڤەرێكرن یانەیا هندرێن هەموو هێزا خوە مەزێخیت بۆ ب دەستڤەئینانا كۆپا كوردستانێ بەلێ یانەیا ئاكرێ دێ پتر بزاڤا كەت ،بریارە جەماوەرەكێ زۆرێ ژ ئاكرێ بگەهیتە زاخۆ بۆ پشتەڤانیا یانەیا خوە ئەڤە ژی هێزەكا دی یە، ئەم ب هەموو رەنگا بەرهەڤین بۆ یاریا دووماهیێ و مە چاڤ ل وێ چەندێ كو ئاكرێ ناسناڤێ كۆپا كوردستانێ ژی ب دەستڤەبینیت.
بۆ زانین هەلگرێن كۆپا كوردستانێ بڤی رەنگی نە، ئارارات، زاخۆ، پێشمەرگەیا سلێمانی، زێرەڤانی، برایەتی، پێشمەرگەیا هەولێر، ئێكەم كۆپا ل وەرزێ 2006-2007 بوو.
