ئەگەرێن دەروونی و ژینگەهی دبنە هۆکارێن هزرکرنا زێدە
بێوار حەمدی:
دەرونناسەکی دیار کر، دەمێ مرۆڤ هزرێن زێدە دکەت، پتر سەرنجێ ددەتە سەر ڕوودانێن ڕابردوو و پەشێمانییێ و گۆت؛ چەندین ئەگەرێن دەروونی و ژینگەهی هەنە کو دبنە ئەگەرێ هزرکرنا زێدە، و گەلەک جاران ژی دبنە ئەگەرێ تێکچوونا ژیانا ڕۆژانە.
سەبارەت هزرکرنا زێدە دەروونناس یاسر سەعید، د دیدارەکێ دا دیار کر کو مەبەست ژ هزرکرنا زێدە، ئانکۆ ئاسێبوونا مەژییە دناڤ بازنەیەکا بەردەوام و نە پێدڤی یا هزران دا، و د ڤی دەمی دا مرۆڤ پتر تەرکیزێ دکەتە سەر ڕوودانێن بۆری و پەشێمانی و دلگرانیێ و گۆت: چەندین ئەگەرێن دەروونی و ژینگەهی هەنە کو دبنە ئەگەرێ هزرکرنا زێدە، وەکو: نەبوونا پشتڕاستیێ ل دور پاشەڕۆژ و بڕیاران، هەولدانا وێ چەندێ کو هەموو تشت بێ کێماسی بن، فشارێن دەروونی و ئەزموونێن نەخۆش و کێمبوونا باوەریێ ب خۆ.
یاسر ئەو چەندە ژی دا زانین، دەما کو هزر دبنە ئەگەرێ تێکچوونا ژیانا ڕۆژانە وەکو، نڤستن، کار و پەیوەندی بۆ ماوەیەکێ درێژ و بەردەوام، بێگومان دێ نەخۆشیێن دەروونی ژێ پەیدابن، وەکو نەخۆشیێن: ترس و دوودلیا بەردەوام، خەمۆکی، تێکچوونا واسواسا دەروونی، و تێکچوونا خەوێ.
دەروونناس یاسر سەعید دیار کر ژی، گەلەک رێ هەنە ژ بۆ چارەسەرکرنا هزرکرنا زێدە، ژ وان ژی: هشیاری و نیاسینا هزران؛ تێگەهشتن ل سەر وێ چەندێ کو ئەڤە بتنێ هزرن و نە ڕاستینە؛ ئەنجامدانا راهێنانێن هشیاریێ ب ڕێیا تەکنیکێن هەناسەدانێ و وەرزشێ؛ تەرخانکرنا ١٥ هەتا ٢٠ خولەکان د ڕۆژێ دا تنێ بۆ هزرکرنێ و گۆت؛ ئەگەر ژ ڤی دەمی پتر لێهات، دڤێت هزر بهێنە نڤیسین و پاشخستن بۆ دەمەکێ دی؛ هەروەسا سەرەدان و وەرگرتنا ڕاوێژا ڕاوێژکارێ دەروونی.
