بابەكر زێباری: بەغدا گەهشتییە وێ باوەریێ كو پێشمەرگە دەزگەهەكێ پاراستنا ئارامیێ یە
دیدار/ دلۆڤان ئاكرەیی
شیرەتكارێ سەربازی یێ سەرۆكێ هەرێما كوردستانێ دیاركر، گۆهۆڕین د هەلوەستێ بەغدایێ دا بەرامبەر هێزێن پێشمەرگەی دروست بوویە، ب شێوەیەكی كو نێرینا حوكمەتا فیدرال ب رێژەیا 180 پلەیان گۆهۆڕین ب سەردا هاتییە و ژ ئالییەكێ دی ڤە رەفتارێن ئابۆری یێن بەغدایێ بەرامبەر شایستەیێن دارایی و بەرهەمێ جۆتیارێن هەرێمێ ب توند و جوداهیكار هەژمارت و گۆت هێزا پێشمەرگەی هێزەكا دەستووری یە و نەبوویە گەف بۆ چ ئالییەكی.
بابەكر زێباری، شیرەتكارێ سەربازی یێ سەرۆكێ هەرێما كوردستانێ بۆ رۆژنامەیا (ئەڤرۆ) گۆت: بەرپرسێن بەغدایێ گەهشتینە وێ باوەری و نێرینێ كو پێشمەرگە دەزگەهەكێ ئەمنی و پاراستنێ یە و ل بن سێبەرا دەستوورێ فیدرالی یە و پێشمەرگە وەك زێڕەڤانەكێ فەرمی یێ هەرێمێ كار دكەت و چوجاران نەبوویە گەف بۆ سەر ناڤخۆیا ئیراقێ و نە ژی بۆ دەوروبەران، چونكی ئەركێ وی یێ سەرەكی و بنەڕەتی تنێ پاراستنا ئارامییا دەڤەرێ یە.
د پشكەكا دی یا ئاخڤتنا خۆ دا، زێباری رۆناهی ئێخستە سەر كێشەیێن ئابۆری و دارایی د ناڤبەرا هەولێر و بەغدایێ دا و گۆت: حوكمەتا بەغدا رەفتارەكا توند ل گەل هەرێمێ دكەت، مووچە و شایستەیێن هەرێمێ ناهنێریت و رێگریێ ل كارگەهێن هەرێمێ دگریت و هەڤكارییا وان ناكەت و د وەرگرتنا گەنمی و بەرهەمێن چاندنێ یێن هەرێمێ دا، جوداهییەكا مەزن د ناڤبەرا پارێزگەهێن ئیراقێ و یێن هەرێما كوردستانێ دا دهێتە كرن و بەغدا د دابەشكرنا داهاتی دا ژی ب جوداهی سەرەدەریێ دكەت و ب تەمامی هەڤكارییا دارایی یا وان گرۆپان دكەت یێن كو ژ یاسایێ دەرچووین، بەلێ بەرۆڤاژی، ئاستەنگان دئێخیتە پێشبەری ماف و شایستەیێن دستووری یێن هەرێما كوردستانێ.
شیرەتكارێ سەربازی یێ سەرۆكێ هەرێمێ گەشبینییا خۆ دیار كر و گۆت: ئەڤ كەسێن نوو یێن هاتینە سەر كار، هیڤیدارین ببنە ئەگەرێ دروستبوونا گۆهۆڕینێن ئەرێنی د پەیوەندیان دا، چونكی د دیتنا مە دا ئەڤە كەسێن هەڤسۆز و بەرسڤدەرن بۆ چارەسەركرنا كێشەیان.
