باژێڕێ دهۆكێ دێ ڤاڤارتنێن كۆپا ئیراقێ یا ڤۆلی بۆلێ مێهڤان كەت
ب فەرمی فدراسیۆنا ڤۆلی بۆلا ئیراقێ باژێرێ دهۆك هەلبژارت بۆ هەڤڕكیێن ڤاڤارتنێن قارەمانییا ئیراقێ و داخواز ژ هەر یانەیەكێ كرییە حەزا پشكداریێ هەبیت ب نڤێسارەكا فەرمی هەتا دەستپێكا ڤێ مەهێ ئاراستەیی فیدراسیۆنێ بكەن.
د داخویانیەكا رۆژنامەڤانی دا حەبیب عەلی ئەللاوەندی سەرۆكێ فدراسیۆنا ناڤهاتی گۆت: بڕیار ئێكلا بوویە قووناغا ئێكێ یا ڤاڤارتنێن كۆپا ئیراقێ ل سەر ئاستێ كچان بۆ پێشكەڤتیان دێ ل هۆلا گرتییا یانەیا سەنحاریب ل پارێزگەها دهۆكێ هێتە كرن و ژڤانە ئەڤ هەڤڕكییە ل حەفتێ مەها بهێن دەسپێبكەت، هەر یانەیەكا تیمەكا كچان هەبیت وحەزا پشكداریێ بكەت دێ ب نێڤسارەكا فەرمی دگەل وەرگرتنا مەرجان بۆ فدراسیۆنێ هنێریت و ژڤانێ وەرگرتنا یانەیێن پشكدار هەتا ئێكێ مەها بهێت بیت، دووڤدا دێ كۆمبوونەكا تایبەت هێتە كرن ژبۆ زانینا ئەوان یانەیێن پشكدار بەری دانانا ڕێنمایێن قارەمانیێ و چاوانییا بڕێڤەبرنا سیستەم و شێوازێ خولێ و دەربازبوونا یانەیان بۆ قووناغا دووماهیێ.
ژلایەكێ دووڤە ناڤهاتی گۆت: یانەیا سەنحاریب قارەمانا وەرزێ بۆری یا ئیراقێ وەكو هەژیاتیەك ئەڤ مێڤاندارییە بۆ هاتییە دانان، هەروەسان ژبەر هەبوونا خالێن سەركەڤتنا قارەمانیێ ژ ژێرخانەیا وەرزشی، ب هولێن ڕاهێنانان و یارییان، سەقا و جهێ گونجایی، ئەڤچەندە ژی ب ڕازیبوونا ئەندامێن فدراسیۆنێ بوون، پێخوەشحالێن پشتی چەند سالێن ڤەقەتیانێ دوبارە قارەمانییا ڤۆلی بۆلێ ل سەر ئاستێ كچان بهێتە پارێزگەها دهۆكێ و دناڤ هولا قارەمانا ئیراقێ، گەشبینن دێ ڕێكخستنەكا سەركەڤتی بیت و پشكدارییەكا باش یا یانەیێن ئیراقێ و كوردستانێ بیت.
بۆ زانین ل وەرزێ بۆری و بۆ جارا دویێ د دیرۆكا خوە یانەیا سەنحاریب بوو قارەمانا ئیراقێ پشتی د یارییا دووماهیێ دا ب سەركەڤتی ل سەر هەڤڕكا خوە یانەیا ئەكاد عەنكاوا ب سێ گێمان بەرانبەر دو گێمان و شیا نوونەراتییا ئیراقێ د قارەمانییا رۆژئاڤا ئاسیا دا بكەت ل ڕێزا پێنجێ بهێت.
