نێچیرڤان بارزانی: ئێكگرتنا پێشمەرگەی دەسپێكا قووناغەكا نوویە
ب بەرهەڤبوونا نێچیرڤان بارزانی، سەرۆكێ هەرێما كوردستانێ و مەسرور بارزانی، سەرۆكێ حوكمەتا هەرێما كوردستانێ و قوباد تالبەانی، جێگرێ سەرۆكێ حوكمەتا هەرێما كوردستانێ و شۆڕش ئیسماعیل، وەزیرێ پێشمەرگەی و فەریقێ ئێكێ ڕوكن عەبدولئەمیر شەمەری، ڕێڤەبەرێ نڤیسینگەها فەرماندەیێ گشتی یێ هێزێن چەكدارێن ئیراقێ ڕێوڕەسمێن ئێكگرتنا فەرمی یا هێزێن پێشمەرگەی ل 21/9/2026، هاتنە ئەنجامدان،
نێچیرڤان بارزانی، سەرۆكێ هەرێما كوردستانێ د وان ڕێورەسماندا پەیڤەك پێشكێشكر و تێدا ڕاگەهاند كوردستان پێدڤی ب ئێك هێز و ئێك فەرماندەیی هەیە و «ئێدی پێشمەرگە هێزا حزبی نینە، بەلكو هێزەكا كوردستانی یە».
دەقێ پەیڤا نێچیرڤان بارزانی، سەرۆكێ هەرێما كوردستانێ:
ب خێرهاتنەكا تایبەت ب فەریقێ ئێكێ ڕوكن عەبدولئەمیر شەمەری، بەرپرسێ نڤیسینگەها فەرماندەیێ گشتی یێ هێزێن چەكدار یێن ئیراقێ دكەم كو ل ڤێرە ل گەل مە بەرهەڤ بوویە. بەرهەڤبوونا وی ل ڤێرە، دوپاتكرنە ل سەر گرنگییا هەڤكارییا د ناڤبەرا لەشكەرێ ئیراقێ و پێشمەرگەی دا، وەكو پشكەك ژ سیستەمێ بەرگرییا ئیراقێ، گەلەك ب خێر بێی.
گەلەك خوەشحالم ئەڤرۆ د ڤێ ڕێوڕەسمێ دا پێكڤەینە بۆ ڕاگەهاندنا دووماهی پێنگاڤا ئێكگرتنا هێزێن پێشمەرگەی و دەستبكاربوونا فەرماندەیا ئێك و دوو یا هێزا پێشمەرگەیێ كوردستانێ. ب ڤێ پێنگاڤا گرنگ، ئێدی هیچ هێزەك ل دەرڤەی پەیكەرێ وەزارەتا كاروبارێن پێشمەرگەی نامینیت.
ئەڤ هەلكەفتە هەڤدەمە ل گەل بیرئینانا چار سالییا ئیمزاكرنا یاداشتا تێكگەهشتنا وەزارەتا كاروبارێن پێشمەرگەی و وەزارەتا بەرگرییا ئەمریكایێ (پێنتاگۆن) كو بەری چار سالان د ڕۆژەكا وەكو ئەڤرۆ دا، 21 ئیلۆنا2022 هاتە ئیمزاكرن. سوپاسییا پشتەڤانی و هەڤكارییا بەردەواما وان دكەم بۆ ڤێ پرۆسەیێ و بۆ هاریكارییا هەرێما كوردستانێ و ئیراقێ ب تایبەت ل شەڕێ دژی تیرۆرستێن داعشێ .
بەردەوامییا ڤان بزاڤان ژی دزڤڕیتەڤە بۆ سالا 2016 دەمێ ل سەر دەستێ سەرۆك مەسعود بارزانی پرۆسەیا چاكسازیێ ل وەزارەتا پێشمەرگەی دەست پێ كری.
ئەو د دەمەكێ دا بوو كو پێشمەرگە ل بن فەرماندەیا سەرۆك بارزانی دا ئەفسانەیا داعشێ شكاندی، وەكو چاوا بەرێ ژی ل سالا 2014 هەر ب فەرمانا سەرۆك بارزانی پێشمەرگە چوونە كۆبانی تاكو بەرگریێ ژێ بكەن و بەرپەرەكێ گەش د دیرۆكا گەلێ كوردستانێ دا بۆ بەرگریكردنێ تۆمار كر. لەوا ئەڤە هەلكەفتەكە گەلێ كوردستانێ دەمەكێ درێژە چاڤەڕێی دكەت و سالانێن زۆرە ژ پێناڤ وێ دا مە هەموو ئالییان كار كریە.
ئەڤە تنێ گۆڕانكاریەك د پەیكەر و ڕێكخستنێ دا، یان تەنێ ڤەگوهاستنا یەكەیان ژ پێكهاتەیەكێ ڤە بۆ پێكهاتەیەكێ دی نینە، بەلكو پێنگاڤەكا نیشتمانی یا مەزنە د كاروانێ دروستكرنا هەرێما كوردستانێ دا.
سالێن بۆری بەردەوام مە گۆتییە: كوردستان پێدڤی ب ئێك هێز، ئێك وەزارەت و ئێك فەرماندەیی هەیە. مە گۆتییە: دڤێت پێشمەرگە هێزەكا نیشتمانی یا دوور ژ دەستێوەردان و ناكۆكییا حزبی بیت. ئەڤرۆ ژی، پێنگاڤەكێ مەزن بەر بل بدەستڤەئینانا ڤی ئارمانجێ دهاڤێژین.
دەمێ مەترسی ل سەر كوردستانێ دروست بووی، جوداهی دناڤبەرا پێشمەرگەیەكی و پێشمەرگەیەكێ دی، دەڤەرەكێ و دەڤەرەكا دی دا نەبوو. ل دژوارترین دەمان دا، پێشمەرگە د ئێك سەنگەرێ دا ڕاوەستایینە، پێكڤە قوربانی داینە و خوونا وان ژ پێناڤ پاراستنا ئێك ئاخ و ئێك گەلی دا تێكەل بوویە. یا ل گۆڕەپانێن شەڕی دا پێشمەرگە ئێكگرتی، ئەڤرۆ پێدڤییە ل دەزگەه، فەرماندەیی و بڕیارێ دا ژی ئێكبگریت.
پێشمەرگە خودانێ دیرۆكەكا پرشنگدارە. لەوما ئەڤرۆ ئەم ڤێ دیرۆكێ و سەرجەم ڤان قوربانیدانان د ناڤ ئێك دەزگەهێ نیشتمانی دا كۆمڤەدكەین. دیرۆكەكا كو چەندین نڤشێن پێشمەرگەی دروست كرینە، دكەینە هێزەكا ئێكگرتی بۆ پاراستنا پاشەڕۆژا كوردستانێ. باشترین وەفاداری ژی بۆ شەهیدێن مە ئەوە كو قوربانیدانا وان بكەینە بنەمایێ پێكڤەكاركرنێ و ئێكڕێزییا ناڤخوەییا مە.
ئێكگرتنا هێزێن پێشمەرگەی دووماهیكا ڤێ پرۆسەیێ نینە، بەلكو دەستپێكا قووناغەكا نوو یە كو ڕەنگە دژوارترژی بیت. ژ ئەڤرۆ و ێڤە، پێدڤییە ئەڤ ئێكڕێزییە د هەموو تشتەكی دا ڕەنگ بدەتەڤە: د فەرماندەیی و سەركردایەتیێ دا، د بڕیار و فەرمانێ دا، د مەشق و ڕێكخستنێ دا، د ماف و ئەركی دا، د پلەبلندكرنێ و د باوەرییا بڕوایا سەربازی و دیسپلینێ دا.
پێدڤییە بۆ هەموویان ڕۆهن بیت كو دەزگەهێ سەربازی نابیتە گۆڕەپانا ململانێیا سیاسی. حزب د هەلبژارتنان دا هەڤڕكیێ دكەن، جوداهی د بەرنامە، بۆچوون و هەلوەستێن وان دا دبیت، ئەڤە ل هەر سیستەمەكێ دیموكراتی دا تشتەكێ گەلەك ئاسایی یە. لێ پێشمەرگە پێدڤییە د سەر هەڤڕكییا حزبی دا بمینیت، چونكی هێزا حزبی نینە، بەلكو هێزا كوردستانی یە.
لەوما مەزنترین خزمەتا كو ئەڤرۆ پێشكێشی پێشمەرگەی بكەین ئەوە ڕێز ل دەزگەهێ وێ بهێتە گرتن، تا ئەركێن خوە یێن پیشەیی و نیشتمانی بێی دەستێوەردانا سیاسی و حزبی بجهـ بینیت.
سەركەفتنا ڕاستەقینە یا ئێكگرتنێ ب هەژمارا وان یەكەیان ناهێتە هەژمارتن یێن كو چووینە دبن چەترا وەزارەتێ ڤە، بەلكو ب وێ چەندێ دهێتە هەژمارتن كو هەر پێشمەرگەیەك هەست بكەت كو دەزگەهێ وی وەزارەتا كاروبارێن پێشمەرگەیە، سەركردایەتییا وی فەرماندەیا سەربازی یا وی یە و هەڤسەنگەرێ وی ل هەمان یەكەیێ دا برایێ ئەركێ وی یە، بێی گوهدانا وێ چەندێ كو سەر ب چ ئالیێ ڤەیە، یان خەلكێ كیش دەڤەرێ یە.
ئەڤە یە ئەو پێشمەرگەیێ گەلێ كوردستانێ دڤێت: پێشمەرگەیەكێ پیشەیی، ڕێكخستی، هەڤچەرخ، باش هاتییە ڕاهێنان و پرچەككری كو گرێدای یاسا و دەزگەهان بیت، جهێ باوەرییا گەلێ خوە و جهێ ڕێزا دۆستێن خوە بیت.
پێشمەرگێن قەهرەمان،
هوون هێزا هەموو كوردستانێ و سەرجەم پێكهاتەیانە. ئەركێ هەوە پاراستنا ئاسایش، شكۆ و ژیانا هەموو وان وەلاتییانە یێن كو ل سەر ڤێ ئاخێ دژین، بێی جوداهی. كورد، توركمان، مەسیحی، ئێزدی، عەرەب و سەرجەم پێكهاتەیێن كوردستانێ دڤێت د جلكێ پێشمەرگەی دا هێزەكێ ببینن كو پارێزگاریێ ژ هەموویان دكەت.
هەڤدەم، هێزا ئێكگرتی یا پێشمەرگەی پشكەكە ژ سیستەمێ بەرگرییا ئیراقا فیدڕال. ب هێزكرنا شیانێن وی و ب هێزكرنا هەماهەنگییا د ناڤبەرا پێشمەرگەی و لەشكەرێ ئیراقێ دا، ل خزمەتا ئاسایشا هەرێما كوردستانێ و هەموو ئیراقێ دایە و شیانێن هەڤپشك یێن مە بۆ ڕووب ڕووبوونا تیرۆرێ و پاراستنا ئاسایش و ئارامییا هەموو ئیراقێ زێدە دكەت.
لەوما ل ڤێرێ جارەكادی داخواز ژ حوكمەتا ئیراقا فیدڕال دكەین ب گورەی دەستوور و یاسایێ سەرەدەریێ ل گەل پێشمەرگەی بكەت و ئەرك و پێگیرییێن خوە بەرامبەر ب پێشمەرگەی بجهـ بینیت و هەموو ماف و شایستەیێن وی مسۆگەر بكەت.
هەر د ڤێ هەلكەفتێ دا سوپاس و پێزانینا خوە بۆ وەلاتێن دۆست دوپات دكەینەڤە: ئەمریكا، هەڤپەیمانییا نێڤدەولەتی و هەموو وان وەلاتێن دۆست یێن كو د شەڕێ دژی داعشێ دا ل گەل مە دا ڕاوەستاین، پاشی ژی د بوارێن مەشق، چاكسازی، ڕێكخستن و ئێكگرتنا هێزێن پێشمەرگەی دا هاریكارێن مە بوون و ل گەل مە دا گەلەك وەستیا بوون .
سوپاس و پێزانین بۆ بەریتانیا، ئەلمانیا، هۆلەندا، ئیتالیا و فەرەنسا. دۆستێن مە گەلەك پێشكێش كرینە و ئەم پشتەڤانی و هاریكارییا وان گەلەك ب بلند د هەلسەنگینین.
لێ سەركەفتنا ڤێ پرۆسەیێ بەری هەموو تشتەكی پشتبەستنێ ب ئیرادەیا مە دكەت. یا ئەڤرۆ ئەم گەهشتینی بەرهەمێ هەڤكاری، ئیرادە و بەرپرسیارەتییەكا نیشتمانی یا كوردستانی یە. لەوما سوپاسییا پارتی دیموكراتی كوردستانێ و ئێكەتی نیشتمانی كوردستان دكەم بۆ بڕیار و ئیرادەیا سیاسی یا وان بۆ سەرئێخستنا ڤێ پرۆسەیێ.
سوپاسییا ئەرك و بزاڤ و پشتەڤانییا بەردەواما برایێ بەڕێز كاك مەسرور بارزانی، سەرۆكێ حوكمەتا هەرێما كوردستانێ دكەم كو د هەموو بزاڤێن خوە دا د ڤان چەند سالان دا بۆ وێ چەندێ بوو كو پرۆسە ب ڕێكوپێكی بەر ب پێشڤە بچیت و ئێك بگریتەڤە.
سوپاسییا بزاڤێن برایێ بڕێز كاك قوباد تالەبانی، جێگرێ سەرۆكێ حوكمەتا هەرێمێ دكەم، سوپاس و دەستخوەشی ژ تیمێن مە ل سەرۆكایەتییا هەرێمێ، ل حوكمەتا هەرێما كوردستانێ دكەم، سوپاس بۆ بەرێز شێخ جەعفەر شێخ مستەفا جێگرێ سەرۆكێ هەرێمێ، بەرێز كاك مستەفایێ سەید قادر جێگرێ سەرۆكێ هەرێما كوردستانێ بۆ ئەركێن وی ل وی سەردەمی دا كو وەزیرێ كاروبارێن پێشمەرگەی بوو.
سوپاس و دەستخوەشی بۆ بەرێزان وەزیر و وەزارەتا كاروبارێن پێشمەرگەی، فەرماندە، ئەفسەر، لیژنە و تیمان كو ب درێژاهییا ڤان سالان دلسۆزانە، وەفادارانە كار كرینە، ل گەل هەموو وان ئالییان یێن كو پشكدار بوون ل گەهشتن ب ڤێ قووناغێ.
پێشمەرگێن قەهرەمان،
ئەڤرۆ بەرپرسیارەتییا هەرە مەزن یا هەوە دەست پێ دكەت. دەمێ جلكێن پێشمەرگەی ل بەرخوە دكەن، ئێدی هوون پێشمەرگەیێن كوردستانێ نە. پارێزگاریێ ژ ڤێ ئێكڕێزیێ بكەن. نەهێلن ناكۆكییێن سیاسی ببنە ئاستەنگ د ناڤبەرا هەوە دا. ڕێكێ نەدەنە هیچ ئینتیمایەك ژ هەڤسەنگەرێ هەوە، ژ دەزگەه و ئەركێ هەوە ب هێزتر بیت. گەلێ كوردستانێ باجەكا مەزن ژ پێناڤ ئازادی، ئاسایش و شكۆیا خوە دایە و پێشمەرگە هەردەم پێشەنگێ ڤێ قوربانیدانێ بوویە.
هەر د ڤێ هەلكەفتێ دا ب ڕێز و شكۆڤە هەموو وان پێشمەرگەیێن قەهرەمان ببیر دئینینەڤە یێن كو ژ پێناڤ ئازادیێ دا و بۆ بەرگریكرن ژ كوردستانێ گیانێ خوە بەخشی. سلاڤ و ڕێزا بۆ خێزان و كەسوكارێن سەربلند و خۆڕاگرێن وان دهنێرین.
سلاڤ ل شەهیدێن زیندی، ئەو پێشمەرگەیێن قەهرەمان یێن ل بەرەیێن بەرگریێ دا بۆ پاراستنا كوردستانێ بریندار بووینە. سلاڤ و ڕێزا بۆ وان دهنێرین و ب ڕێزڤە ل قوربانیدانا وان دنێڕین.
سلاڤ ل هەموو پێشمەرگەیێن قەهرەمانێن كوردستانێ و ل فەرماندەیێن وان.
دڤێت ل دووماهییێ سوپاسییا برایێ بەڕێز كاك مەسرور بكەم كو ئەڤرۆ پیرۆزباهییا ڕۆژا ژدایكبوونا من ل من كری.
