مەسرور بارزانی: سەرۆك بارزانی ڕۆلەكێ كاریگەر د ئێكگرتنا هێزا پێشمەرگەی دا هەبوو
سەرۆكێ حوكمەتا هەرێما كوردستانێ ل ڕێوڕەسمێن ئێكگرتنا فەرمی یا هێزێن پێشمەرگەی ڕاگەهاند، ئەم د ئێكگرتنا پێشمەرگەی دا سەركەفتین و نها هەموو هێز ل بن چەترا وەزارەتا پێشمەرگەی دانە، دبێژیت ژی «مە دڤێت پێشمەرگە بۆ ئێكلاكرنا ململانێیا ناڤخوەیی و حزبی نەهێتە بكارئینان».
دەقێ پەیڤا مەسرور بارزانی، سەرۆكێ حوكمەتا هەرێما كوردستانێ:
ئەڤرۆ ڕۆژەكا دیرۆكی یە بۆ كوردستانێ و بۆ پێشمەرگەی. ڕۆژەكا گەلەك تایبەت ژی یە بۆ من ب خوە كو هەر ژ ڕۆژا ئێكێ یا دەستبكاربوونا من وەكو سەرۆكێ حوكمەتا هەرێما كوردستانێ، د كارنامەیا كابینەیا نەهێ یا حوكمەتێ دا مە سۆز دا كو ب هەموو شیانێن خوە ڤە، كار بۆ ئیكگرتنا هێزا پێشمەرگەیێ كوردستانێ بكەین. لەوما دەمێ چار سالێن بۆری دا، ل بن ڕێنمایی و سەرپەرشتییا ڕاستەوخوە یا سەرۆك بارزانی و ب هەڤكاری و پشتەڤانییا كاك نێچیرڤان بارزانی، سەرۆكێ هەرێما كوردستانێ و دۆستێن مە ل ئەمریكا و هێزێن هاوپەیمانان، پشتی چەندین كۆمبوون و كاركرنا چڕ و كارێ بێ ڕاوەستان، مە شیایە بگەهینە ڤێ قۆناغا نها، كو ئەڤرۆ ئێكگرتنا هێزێن پێشمەرگەی ڕابگەهینین و ل چارچۆڤەیێ تێكگەهشتنا هەڤپشك یا د ناڤبەرا وەزارەتا شەڕی یا ئەمریكا و حوكمەتا هەرێما كوردستانێ دا، پرۆسەیا ئێكگرتن و ڕێكحستنا هێزێن پێشمەرگەی د دەمێ چار سالان دا، ب سەركەفتی ب ئەنجام گەهشت.
ل ڤێرە ب پێدڤی دزانم، ب ڕێز و پێزانینەكا مەزن ڤە، ئاماژە ب ڕۆلێ گرنگ و پشتەڤانییا سەرۆك بارزانی بكەم كو هەردەم وەكو ڕێبەرەكێ نیشتمانی و سەرۆكەكێ پێشمەرگەی، هەموو ژیانا خوە ل خەم و خزمەتكرنا پێشمەرگەی و كوردستانێ ب سەر بریە و كارا بەردەوام كریە بۆ وێ چەندێ كو ناڤ و شكۆیا پێشمەرگەی بلند و پاراستی بیت و ژ نێزیكڤە ژی، سەرپەرشتییا پرۆسەیا ئێكگرتنا پێشمەرگەی كریە.
هەروەسا سوپاسییەكا تایبەت یا پشتەڤانییا بەردەواما برایێ بەڕێز كاك نێچیرڤان بارزانی، سەرۆكێ هەرێما كوردستانێ دكەم كو ڕۆلەكێ كاریگەر د سەركەفتنا چاكسازییان دا هەبوو.
سوپاسییا بەڕێز كاك قوباد تالەبانی، جێگرێ سەرۆكێ حوكمەتێ دكەم كو هەماهەنگ و هەڤكار بوو ل سەرئێخستنا پرۆسەیا چاكسازیێ و ب ئەنجام گەهاندنا وێ.
هەروەسا سوپاس و پێزانینەكا مەزن بۆ دۆستێن مە ل ئەمریكا و هەموو هێزێن هەڤپەیمانان، بۆ هەموو هەڤكاری و پشتەڤانییا وان د سالێن بۆری دا، كو بێگومان پشتەڤانییا وان، ڕۆلەكێ كارا شاندنا تیرۆرستێن داعشێ ژ ئالییێ پێشمەرگەی ڤە و ل دووماهیكێ پاراستنا ئاسایش و ئارامییا هەرێما كوردستانێ دا هەبوویە.
سوپاس بۆ بەڕێزان كاك شۆڕش ئیسماعیل، وەزیرێ پێشمەرگەی و كاك عەبدولخالق بابیری، بریكارێ وەزارەتێ و كاك عیسا عوزێر، سەرۆك ئەركان و هەموو بەرپرس و پلەدارێن وەزارەتێ و فەرماندەیێن پێشمەرگەی و هەموو پێشمەرگەیێن قەهرەمان بۆ وەسیان و بزاڤێن وان بۆ سەرئێخستن و ب ئەنجام گەهاندنا پرۆسەیا ئێكگرتنا هێزێن پێشمەرگەی. دەستخوەشیێ لێ دكەم و هیڤییا سەركەفتنێ بۆ دخوازم.
ئەڤ ئێكگرتنە، قووناغ و پێنگاڤا ئێكێ یا پرۆسەیەكا دوور و درێژە. چونكی ئەڤ ئێكگرتنە چەند گرنگە، لێ قووناغا داهاتی گەلەك گرنگترە، كو ئەو ژی پێك دهێت ژ قۆۆناغا پێشڤەبرنا شیاناسازی و پێشئێخستنا هەمەلایەنا پێشمەرگەی و ب تایبەت شیانێن مرۆڤی و گرنگیدان ب ئاست و جۆرێ مەشقا لەشی و هشیارییا پێشمەرگەی ب گورەی پێڤەر و ستانداردێن سەربازی یێن نێڤدەولەتی، بۆ وێ چەندێ كو وەكو هێزەكا نیشتمانی یا پیشەیی و ڕێكخستی و ئێكگرتی، ل ئاستێ ئەرك و بەرپرسیارەتییا گرنگ و نیشتمانی یا وێ دا بیت بۆ ڕووب ڕووبوونا ئاستەنگان و پاراستنا ئاسایش و ئارامییا هەرێما كوردستانێ.
پێشمەرگە تنێ هێزەكا چەكدار یا سەربازی نینە، بەلكو سیمبۆلا خەبات و قوربانیدان و ناسنامەی خەباتا خەلكێ كوردستانێ و جهێ شانازییا هەموو كوردستانییانە.
ئازایەتی و گیانفیدایییا پێشمەرگەی، ل بەرگریكردنێ ژ مافێن ڕەوا یێن خەلكێ كوردستانێ ب گشت پێكهاتەیێن جودا جودا یێن وێ ڤە و شكاندنا تیرۆرستان و داكۆكیكرن ژ بهایێن بلند یێن ئازادی و دیموكراسی و پێكڤەژیانا ئاشتییانە یا هەرێما كوردستانێ، شانازی و سەروەرییەكا مەزن ب هێزا پێشمەرگەی بەخشییە.
ئەڤرۆ ژی پێشمەرگە، وەكو هێزەكا دەستووری وپشكەكێ گرنگێ سیستەمێ بەرگرییا ئیراقێ، پشتڕاستكەر وگرەنتیێ پاراستنا ئاشتی و ئاسایش و ئارامییا ئیراقێ و هەرێما كوردستانێ یە. لەوما ل ڤێرێ دوپاتیێ ل گرنگی و پێدڤییا ب هێزكرنا هەڤكاری و هەماهەنگییا ئەمنی و سەربازی یا د ناڤبەرا هێزا پێشمەرگەی و لەشكەرێ ئیراقێ دا دكەین ژ پێناڤ پاراستنا زێدەتر یا ئارامییا ئیراقێ. ژ ڤی ڕوویڤە بەرهەڤی و پشتەڤانییا خوە بۆ سەرۆك وەزیرێن فیدڕال و فەرماندەیێ گشتی یێ هێزێن چەكدار یێن ئیراقێ بەڕێز عەلی زەیدی دووپات دكەینەڤە ژ پێناڤ ب هێزكرنا هەڤكارییا د ناڤبەرا هێزا پێشمەرگەی و لەشكەرێ ئیراقێ دا.
هیڤیدارین حوكمەتا فیدڕال هەڤكار و هاریكارا مە بیت بۆ وێ چەندێ كو مافێن پێشمەرگەی پاراستی بن و مووچە و شایستەیێن دارایی یێن وان ل گەل یێن لەشكەرێ ئیراقێ بهێنە ئێكخستن و هەمان ماف هەبیت، چونكی ب گورەی دەستووری، پێشمەرگە پشكەكە ژ سیستەمێ بەرگرییا ئیراقێ و پێدڤییە مافێن دەستووری و شایستەیێن دارایی یێن وان د ڤی چارچۆڤەی دا بن.
بەرهەڤبوویێن بەڕێز:
هوون ب خوە دزانن كو ئێكگرتنا هێزێن پێشمەرگەی، داخوازەكا ژ مێژە یا مە و هەر كوردستانییەكێ نیشتمانپەروەر بوویە. خوەشبەختانە ئەڤرۆ ئەم سەركەفتین و هەموو هێز چوونە د بن چەترا وەزارەتا پێشمەرگەی ڤە و د چارچۆڤەیێ ئێك هەیكەلێ سەربازی یێ مۆدێرن دا، ژ ڕوویێ ئۆپەراسیۆن، مەشق و ڕاهێنان، سەركردایەتی و كۆنترۆل و ڕاگەهاندن و ژمێریاریێ ڤە، بوونە هێزەكا ئێكگرتی.
بێگومان لایەنگری و ئینتیمایا سیاسی و حزبی، مافەكێ ڕەوا و ئاسایی یێ هەر تاكەكێ یە، لێ دڤێت لایەنگری و ئینتیمایا نیشتمانی و كوردستانی، ببیتە پێڤەر بۆ پێشمەرگەی كو پێدڤی یە د بن سەرپەرشتییا وەزارەتا پێشمەرگەی دا، پێگری بڕیارێن سەر خوەدا بن ب گورەی پلەبەندی و زنجیرەیا سەربازی.
مە دڤێت پێشمەرگە، ئەو هێزا نیشتمانی و كوردستانی بیت كو ل سەر هەموو بەرژەوەندییێن حزبی و تاكەكەسی بیت و بۆ ئێكلاكرنا ناكۆكی و ململانێیا ناڤخوەیی و حزبی نەهێتە بكارهینان. بەلكو ئارمانجا ئێكێ و دووماهییێ یا پێشمەرگەی، بەرگریكرن بیت ژ خەلك و ئاخا كوردستانێ بێی جوداهی و وەكو هەردەم ژی، فاكتەرێ ئاشتی و ئارامیێ بیت ل ئیراقێ و دەڤەرێ.
ل دووماهییێ دا، پیرۆزباهییا ڤێ دەسكەفتا دیرۆكی ل هەموو خەلكێ كوردستانێ دكەم و هیڤییا سالخەمی و سەربلندی و پێشكەفتنا بەردەوام ژی بۆ پێشمەرگەیێن قەهرەمانێن مە دخوازم.
سەرێ ڕێز بۆ شەهیدێن مە دچەمینین و ڕێز و پێزانینا مە بۆ قوربانیدانا مالباتێن سەربلند یێن شەهیدێن پێشمەرگەی و خەبات و وەستیانا پێشمەرگەیێن بریندار و خودان پێدڤییێن تایبەت و پێشمەرگەیێن خانەنشین هەیە.
خودایێ مەزن پێشمەرگە و كوردستانێ ژ هەموو شەڕ و نەهامەتی و نەخوەشیان بپارێزیت.
