بوزانى: روودانێن شنگالێ 960 زارۆ سێوى كرینه
ئه‌ڤرۆ نیوز:
رێڤه‌به‌رییا گشتییا كاروبارێن ئێزدییان داخوازیێن ئێزدییان گه‌هاندنه نه‌ته‌وه‌یێن ئێكگرتى ل جنێفێ، رێڤه‌به‌رێ گشتیێ كاروبارێن ئێزدییان ل وه‌زاره‌تا ئه‌وقاف و كاروبارێن ئاینى راگه‌هاند، وان داخوازیێن ئێزدییان راده‌ستى نه‌ته‌وه‌یێن ئێكگرتى كرینه و تێدا خواستییه، هاریكارییا ئاواره‌یان بهێته‌كرن، ژ هه‌موو ئالییه‌كى ڤه و بزاڤێن رزگاركرنا كه‌سێن دده‌ستێن داعشێ دا بهێته‌كرن و هه‌روه‌سا كاربهێته‌كرن، تاوانا دژى ئێزدییان ب جینۆساید بهێته ناساندن.
خێرى بۆزانى دبێژیت: تیرۆرستێن داعشێ ل سالا ده‌ربازبووى هێرشى شنگالێ كرن و پشتى به‌رخودانه‌كا درێژ، لێ داعشێ ب چه‌كێ خوه یێ پێشكه‌فتى شنگال كۆنترۆلكر، پشتى داعشێ شنگال كۆنترۆلكرى هزاران زارۆ و ژن و پیر و كال كه‌ڤتنه ده‌ستێن وێ رێكخستیێ، هه‌روه‌سا ب ده‌هان كۆمكوژى ل سنۆرێ وێ ده‌ڤه‌رداریێ چێكرن، كو تا نها لگۆرى داوى داتا هزار و 280 ژ خه‌لكێ شنگالێ شه‌هید كه‌ڤتینه و نێزیكى 5 هزار و 838 زارۆ و ژن كه‌ڤتینه ده‌ستێن داعشێ و ل بازارێن مووسل و رقه هاتینه فرۆتن، هه‌روه‌سا نێزیكى 340 هزار كه‌س ژ شنگالێ و 60 هزار كه‌س ژى ژ باشیك و به‌حزانێ ئاواره‌یى هه‌رێما كوردستانێ و توركیا و سووریا بوون، داعشێ 42 مه‌زارێن ئاینى ل شنگالێ په‌قاندن، پترییا مال و ملكێ هه‌موو گوندێن ئێزدییان برییه.
بۆزانى دیاركر، تا نها 2 هزار و 271 كو ژ وان 850 ژن و 313 زه‌لام و 535 كچێن زارۆ و 574 كورێن زارۆ هاتینه رزگاركرن و نها نێزیكى 3 هزار و 566 كه‌سێن ئێزدى دده‌ستێن داعشێ دا ماینه.
هه‌روه‌سا دیاركر، روودانێن شنگالێ بووینه ئه‌گه‌ر 960 زارۆ سێوى بمینن و تا نها 21 گۆرێن بكۆم هاتینه دیتن، كو دناڤا هه‌ر ئێكى دا زێده‌ترى 35 كه‌سان هه‌بووینه، هه‌روه‌سا ده‌هان حاله‌تێن بریندارى و په‌ككه‌ڤتنێ دناڤا ئاواره‌یاندا دروستبووینه كو هه‌ر ژ ئه‌گه‌را هێرشان بوویه، هه‌روه‌سا دیاركر، بنه‌مایێن ئاڤه‌دانكرنێ ل شنگالێ هاتینه ژ ناڤبرن و مال و ئاڤاهى هاتینه وێرانكرن.
له‌وا ژ نه‌ته‌وه‌یێن ئێكگرتى خواستینه، كو نها ئێزدى دنڤا 21 خیڤه‌تگه‌هاندا د ره‌وشه‌كا خراب دا دژین و پێدڤى ب هاریكاریێن ساخله‌مى و فێركرن و كه‌لوپه‌لێن خوارنێ هه‌نه، دڤێت جڤاكێ نێڤده‌وله‌تى ب گرنگ به‌رێ خوه بده‌تێ.
هه‌روه‌سا ئه‌و كه‌سێن نها دده‌ستێن داعشێ دا بزاڤێن مه‌زن بهێنه‌كرن بهێنه رزگاركرن، ب هه‌ر شێوه‌یه‌كى بیت.
هه‌روه‌سا خواستییه ژى ئه‌و تاوانا دژى ئێزدییان هاتییه‌كرن، ب كۆمكوژى (جینۆساید) بهێته هه‌ژمارتن و نها ئه‌و چاڤه‌ڕێى دادگه‌ها نێڤده‌وله‌تى نه بۆ ڤێ یه‌كێ.