بڕیارێن دەستەیا راگەهاندن و گەهاندنا ئیراقێ نەدادن و دێ مافێن خۆ ل دادگەهێ پارێزین
كۆمپانییا كۆڕەك تیلیكۆم بڕیارێن نوو یێن دەستەیا راگەهاندن و گەهاندنێ یا ئیراقێ ب نەدادپەروەرانە و زۆرداری دبینیت و تەكەز دكەت كو ئامادەیە مافێن خۆ ل دادگەهێ بپارێزیت.
د راگەهاندنەكێ دا كۆمپانییا كۆڕەك تیلیكۆم ئاماژە ب وێ دا كو بڕیار و پێنگاڤێن دەستەیا راگەهاندن و گەهاندنێ بۆ وان حهێ حێبەتیێ نینە و تۆمەتبار كر ب وێ چەندێ كو د دەمێ بۆری دا ب مەرەمێن سیاسی چەندین پێنگاڤێن دژی كۆمپانییا وان هاڤێتینە.
كۆڕەك تیلیكۆم باسێ لیژنەیەكێ كر یا كو ب فەرمانا دیوانی ل 27 گۆلانا 2025 هاتییە پێكئینان و ئەنجامێن وێ ژ ئالیێ سەرۆك وەزیرێن بەرێ یێ ئیراقێ ڤە هاتینە پەسەندكرن و ل سەر وێ بنیاتێ ل 22 ئیلۆنا 2025 جڤاتا كۆمیشنەران بڕیار دایە گرێبەستا سازشێ د ناڤبەرا كۆرەك و دەستەیێ دا بهێتە ئیمزاكرن ل هەمبەر دانا مۆلەت 4 جیلێ. كۆمپانییا كۆڕەك دبێژیت ل 23 ئیلۆنا 2025 گرێبەست هاتییە ئیمزاكرن، بەلێ ژ بەر بەربەستێن كارگێڕی بجهئینانا مۆلەتێ هاتییە پاشئێخستن و دانوستاندن د ناڤبەرا ئالیێن حكومی دا تاكو 2 خزیرانا 2026 بەردەوام بوون، بەلێ دەستەیێ بێ كو چارەسەرییان بجهـ بینیت بڕیارا هەلوەشاندنا گرێبەستێ دایە.
كۆڕەك تیلیكۆم تەكەز دكەت كو رێڤەبەرێ جێبەجێكارێ دەستەیێ دەستهەلاتا هەلوەشاندنا وێ گرێبەستێ نینە چنكی ژ ئالیێ لایەنێن بلندێن حوكمەتێ ڤە هاتییە دانان و هۆشداری دا كو ئەڤ پێنگاڤە دێ كاریگەریێ ل سەر ناڤێ ئیراقێ ل بەرامبەر وەبەرهێنەرێن بیانی هەبیت و دیار كر كو چەندین بڕیارێن دادگەهێ د بەرژەوەندییا وان دا هەنە ب ملیۆنان دۆلاران كو تا نهۆ وان ژ بەر رێزگرتنا بزاڤێن حوكمەتێ بحهنەئینابوون.
ل دووماهییێ ژی كۆڕەك تیلیكۆم داخواز ژ عەلی زەیدی، سەرۆك وەزیرێن ئیراقێ كر دەستێوەردانێ بكەت بۆ ڤەگەڕاندنا دادپەروەریێ و تەكەز كر كو دێ ل سەر بەرگریكرنا ل مافێن خۆ و پەنابرن بۆ دادگەهێ بەردەوام بیت.
