بەغدایێ د داڕشتنا پڕۆژەیاسایا بودجەیا 2027ێ دا بنەمایێن (هەڤپشكی، هەڤسەنگی و لهەڤهاتن) پشتگوهـ هاڤێتینە
د چارچۆڤەیێ بەرهەڤییان بۆ داڕشتنا پڕۆژەیاسایا بودجەیا گشتی یا ئیراقێ بۆ سالا 2027ێ، هەرێما كوردستانێ دوپاتیێ ل سەر سێ بنەمایێن نەگهۆڕ دكەت ئەوژی (هەڤپشكی، هەڤسەنگی و لهەڤهاتن) بۆ بڕێڤەبرنا تەڤایا پەیوەندییێن خوە ل گەل حوكمەتا فیدرالی، و داخوازێ دكەت ئەڤ بنەمایە ب تەمامی د داڕشتنا پڕۆژەیاسایا نوو یا بودجەی دا ڕەنگڤەدەن.
سەعید هەركی، ئەندامێ پێشتر یێ پەرلەمانێ كوردستانێ ل ڕاگەهاند، پێداگرییا هەرێما كوردستانێ ل سەر ڤان سێ بنەمایان د دەمەكێ دایە كو ئەزموونا سالێن بۆری دەرێخستینە هەر جورە تاكڕەوییەك، یان پشتگووهـهاڤێتنا پرەنسیپێن لهەڤهاتنا سیاسی و دەستووری، بووینە ئەگەرێ پەككەفتنا بودجەی و دروستبوونا قەیرانێن دارایی كو زیانێن ڕاستەوخوە گەهاندینە ڕەوشا وەلاتییان. د بجهئینانا بنەمایێ هەڤپشكدارییا ڕاستەقینە دا، دڤێت هەرێما كوردستانێ پشكدار بیت د بڕیارێن ئابۆری و داڕشتنا سیاسەتا دارایی، د بنەمایێ سازانێ دا دڤێت دەربازكرنا بڕگەیێن پەیوەندیدار ب ڕێككەفتنا ئالییان بیت و د بنەمایێ هەڤسەنگیێ دا دڤێت پێگیریبوونا هەردو ئالییان ل هەمبەر ماف و ئەركێن وان ب دادی بیت.
ناڤبری گۆت ژی «ژ ئالییەكێ دی ڤە، شایستەیێن دارایی یێن هەرێما كوردستانێ و پرسا بنەجهكرنا پشكا هەرێمێ ب ڕێژەیا 14% وەك تەوەرەكێ ب لەز و گرنگ د دانوستاندنان دا دهێتە ڕۆهنكرن. هەرێما كوردستانێ داخواز دكەت ئەڤ ڕێژەیە ل سەر بنیاتێ ئامار و داتایێن واقعی بهێتە چەسپاندن و ژ چارچۆڤەیێ هەڤكێشەیێن سیاسی بهێتە دەرێخستن، داكو شایستەیێن دارایی یێن كوردستانێ بێ ئاستەنگ و ب شێوەیەكێ بەردەوام بهێنە خەرجكرن».
هەروەسا، بەڕەڤانیكرن ل مووچە و بودجەیا هێزاپێشمەرگەی ئێكە ژ تەوەرێن بنەڕەتی یێن ڕەشنڤیسی. ب گۆرەی مادەیێن دەستووری، هێزا پێشمەرگەی پشكەكە دانپێدانای و دانەبڕیایە ژ سیستەمێ بەڕەڤانییا گشتی یا ئیراقێ، لەوما دڤێت مووچە، دەرمالە و تەمامییا شایستەیێن دارایی یێن وان ب هەمان پێڤەرێن هێزێن ئەمنی یێن فیدرالی سەرەدەری ل گەل بهێتە كرن. د ڤی بیاڤی دا، دوپاتی دهێتە كرن كو دیاركرنا میلاكات و شایستەیێن پێشمەرگەی د ڕەشنڤیسێ بودجەیا 2027 دا دڤێت ب تەمامی پشت ب داتایێن فەرمی یێن وەزارەتا پێشمەرگەی ببەستیت، داكو مافێن دەستووری یێن ڤێ هێزێ پاراستی بن و ژ هەر جورە بڕین یان دەستكارییەكا نەیاسایی ب دوور بن.
