بەناف ئەحمەد ئەگەرێن داكەفتنا ئاست و ئەنجامان دیار دكەت
ئەڤرۆ
زاخۆ، عەلی حاجی:
د داخویانیەكێ دا هاریكارێ راهێنەرێ تیما زاخۆ ئەوا پشكدار د خولا نایابا كوردستانێ یا تەپا پێی دا دیار كر ژ روویێ ئەنجامان ڤە ئەو د رەوشەكا خراب دانە لێ بەردەوام كار دكەن رەوشا تیمێ باشتر لێبكەن و چوونا هندەك یاریزانان ژی كارتێكرنەكا خراب ل تیمێ كر.
زێدەتر بەناف ئەحمەد گۆت: تیما مە یا گەنجە و پرانیا یاریزانان بۆ جار ئێكێ یە یاریێ د خولا نایابا كوردستانێ یا تەپاپێی دا ئەنجامدەن، ژبەر كێم شارەزاهییا یاریزانێن مە گەلەك تووشی هنگاڤتنان دبن و هەتا نوكە ژی نێزیكی پێنچ هەتا شەش یاریزانان شیان نینە یاریێ بكەن و ئەڤ تیمە پێدڤی ب دەمی هەیە هەتا كو بشێن ب شێوەیەكێ رێكسختی و باش یاریێ ئەنجام بدەن، زێدەباری هندێ ژی چەند یاریزانێن مە یێن سەرەكی هاتنە سەر ئێخستن بۆ ناڤ رێزێن تیما زاخۆ دا ئەوا پشكدار د خولا ئیراقێ دا، هەر دیسان ل هێلا هێرشبەریێ ژی مە ئاریشە هەیە ژبەر كو مە یاریزانێن هێرشبەر نینن بتنێ یاریزانەك هەیە د هێلا هێرشبەریێ دا یاریێ دكەت.
ناڤبری گۆت ژی: د یاریا بوری دا بەرانبەر یانەیا ئاكرێ حەمید حاجی دگەل تیما مە دا یاری دكر و 65% تیما مە هاتە گوهۆڕین و هەكە ئەو یاریزانە بمینیتە دگەل مە بێگومان دێ ئاست و ئەنجامێن مە باشتر بن و پێدڤییە د حەفت یاریێن بهێت ژ خولێ دا چو رەنگان نابیت خالان ژ دەست بدەین دا كو تیما مە دانەكەڤیتە خولا پلە ئێك .
