ب سندوقکرنا هشکەرویێن زاخۆ دێ ئاریشەیا لەهیێ هێتە چارەسەر کرن
ئەڤرۆ نیوز، عەلی حاجی :
سەروکێ باژێرڤانیا زاخۆ د داخویانیەکێ دا بۆ ئەڤرۆ نیوز دیار کر ژبەریا پوستێ سەروکاتیا باژێرڤانیا زاخۆ وەربگریت داخوازا سندوقکرنا هشکەرویێن زاخۆ هاتبوونە کرن بەلێ هەتا نوکە نەهاتینە چارەسەر کرن.
زێدەتر بژار مونیب گوت: (وان بەردەوام دەرخستەیێن سندوقکرنا هشکەرویێن دناڤ باژێرێ زاخۆ دا دەرباز بیت بلند کرینە بەلێ هەتا نوکە نەهاتینە چارەسەر کرن و وەکو خوە ماینە و چەندن زێدەگاڤی ژی ل سەر هاتینە کرن کو ب قانونی ژی کرینە ئەو زێدەگاڤی، لەورا ب سندوقکرنا وان هشکەرویێن دناڤ باژێرێ زاخۆ دا دێ ٨٠٪ ئاریشەیا دروستبوونا لەهیێن زاخۆ هێتە چارەسەر کرن و د دەما هاتنا وەزیرێ ناڤخو ژی مە وەزیر ل سەر وێ چەندێ ژی ئاگەهدار کر ژ بەر کو سالانە لەهیێن زاخۆ ژبەر وان هشکەروویان دروست دبیت و وەزیری ژی ژلایێ خوە ڤە داخازا چارەسەر کرنا وێ ئاریشەیێ کری یە و نوکە دا مە دەرخستەیەک دی دروست کری یە و دێ رادەستی جهێن پەیوەیندیدار کەین دا کو بهێتە چارەسەر کرن و چارەسەر کرنا وان هشکەروویان ژی پێدڤی ب نەهـ ملیار دینارایە).
و گوت ژی: ژبەر کو باژێرێ زاخۆ سێ هشکەروویان ب خوە ڤە دگریت و ئەو هشکەروو ژی پێدڤی ب سندوق کرنێ نە و هندەک جهـ پێدڤی ب فرەهیا پێنچ مەتران و بلنداهیا چار مەتران هەیە و هندەک جهێن دیتر فرەهی و بلنداهیا وان کێمتر دبیت ئەڤجا هەکە ئەڤ سالە ئەڤ پروژە بهێتە جێبەجێ کرن د ئەڤ سالە دا دێ لەهیێن ل باژێرێ زاخۆ ٨٠٪ هێنە کێم کرن.
