ب مەرەما ئاڤەدانكرنا شنگالێ و ڤەگەڕاندنا ئاوارەیان، پەرلەمانتارەكێ ئێزدی سێ داخوازییان ئاراستەی بەغدایێ دكەت
دهۆك ،لەزگین جوقی
پەرلەمانتارەكێ ئێزدی ل جڤاتا نوونەرێن ئیراقێ سێ داخوازیێن سەرەكی ئاراستەی حوكمەتا ئیراقێ كرن، ژ وان ژی داخوازا دامەزراندنا هزار كەسان د ناڤ بوودجەیا سالا 2027ێ دا، ئەڤە د دەمەكێ دایە كو ئەڤ داخوازە د چارچووڤەیێ بجهئینانا ڕێككەفتنا شنگالێ دانە.
خالد سەیدۆ، پەرلەمانتارێ ئێزدی ل جڤاتا نوونەرێن ئیراقێ دیاركر كو حوكمەتا ئیراقێ 50 ملیار دینار بۆ قەرەبوویا خەلكێ شنگالێ تەرخانكرینە، لێ هێشتا ئەڤ گوژمەیێ پارەی نەهاتییە مەزاختن.
ناڤبری گۆتژی «مە داخواز كر د ناڤ بوودجەیا سالا 2027ێ دا ئەڤ گوژمەیێ پارەی بۆ قەرەبووكرنا خەلكێ شنگالێ بهێتە زێدەكرن، ژ بەر كو خەلكێ شنگالێ تووشی زیانێن مەزن بووینە و هەتا نوكە شنگال یا وێرانكرییە، هەروەسا مە داخواز كر حوكمەتا ئیراقێ د ناڤ بوودجەیا 2027ێ دا گوژمەیەكێ پارەی بۆ ئاڤەدانییا شنگالێ تەرخان بكەت، داكو خەلك بشێن ڤەگەرنە سەر مالێن خوە».
خالد سەیدۆ زێدەتر گۆت: «د ناڤ دامودەزگەهێن قەزا شنگالێ دا هزار و 376 فەرمانبەرێن گرێبەست هەنە، مە داخواز ژ بەغدایێ كر ڤان فەرمانبەران بكەنە هەمیشەیی، چونكو ئەڤە چەندین سالن نەهاتینە دامەزراندن. ئەم ڕژدین ل سەر دەستڤەئینانا مافێن خەلكێ خوە د ناڤ بودجەیا 2027ێ دا، داكو خەلك بهێنە قەرەبووكرن، ئاڤەدانی دەستپێبكەت و ڕەوش بۆ ڤەگەراندنا ئاوارەیان باشتر بیت».
د سالا 2014ێ دا، تێرۆرستێن داعشێ هێرش كرە سەر شنگالێ و هەموو خەلكێ وێ ئاوارە بوون، هەتا نوكە 270 هزار كەسێن ئاوارە د ناڤ كەمپان دا ماینە و نەشیاینە ڤەگەرنە شنگالێ.
جهێ ئاماژێ یە، ل سالا 2020ێ حوكمەتا هەرێما كوردستانێ ل گەل ئیراقێ و ب بەرهەڤبوونا نەتەوەیێن هەڤگرتی ڕێككەفتنەك بۆ ئاساییكرنا ڕەوشا شنگالێ ئەنجامدا. ئێك ژ خالێن وێ ڕێككەفتنێ، دامەزراندنا دو هزار و 500 پۆلیسێن ژ خەلكێ شنگالێ بوو بۆ پاراستنا تەناهییا دەڤەرێ، لێ هەتا نوكە تنێ هزار و 500 پۆلیس هاتینە دامەزراندن و هێشتا هزارێن دی ماینە ونەهاتینە دامەزراندن.
