تاكە چارەسەری بجهئینانا دستوورییە
دوهی سێشەمبی 15/10/2024، سەرۆكایەتییا هەرێما كوردستانێ د بەیاننامەیەكێدا راگەهاند، نێچیرڤان بارزانی، سەرۆكێ هەرێما كوردستانێ، پێشوازی ل د. محەمەد ئەلحەسان، نوونەرێ تایبەت یێ سكرتێرێ گشتیێ رێكخراوا نەتەوەیێن ئێكگرتی ل ئیراقێ و بەرپرسێ نوو یێ تیما نەتەوەیێن ئیكگرتی ل ئیراقێ (یۆنامی) كر.
د كۆمبوونەكێدا، نێچیرڤان بارزانی، سەرۆكێ هەرێما كوردستانێ پیرۆزباهییا دەستبكاربوونێ ل د. محەمەد ئەلحەسان كر و هیڤییا سەركەفتنێ بۆ خواست، هەموو هەموو پشتەڤانییا هەرێما كوردستانێ بۆ سەرئێخستنا ئەركێ یۆنامی، دوپاتكر.
ژ ئالیێ خوەڤە د. محەمەد ئەلحەسان، سەرەرای نیشاندانا خوەشحالییا خوە ب سەرەدانا هەرێما كوردستانێ، سوپاسییا نێچیرڤان بارزانی و ئالیێن پەیوەندیدارێن هەرێما كوردستانێ كر بۆ هاریكارییا وان ل گەل تیما نەتەوەیێن ئێكگرتی ل ئیراقێ.
د بەیاننامەیا سەرۆكایەتییا هەرێما كوردستانێدا هاتییە ژی» هەردو ئالییان باس ل هەلبژارتنێن پەرلەمانێ كوردستانێ و پەیوەندیێن هەولێرێ و بەغدا و رەوشا پێكهاتەیان، ب تایبەتی ئێزدییان، كر». سەبارەت ڤێ چەندێ نێچیرڤان بارزانی، سوپاسییا هاریكارییا نەتەوەیێن ئێكگرتی بۆ كۆمسیۆنا سەربخوەییا هەلبژارتنان ل ئیراقێ كر.
ل دۆر كێشەیێن هەولێرێ وبەغدا ژی، سەرۆكێ هەرێما كوردستانێ دوپاتكر كو تاكە چارەسەری بجهئینانا دستوورییە ب تمامی و پاراستنا ئارامی و سەقامگیرییا ئیراقێیە، هەروەسا باشكرنا رەوشا ئێزدییان و ڤەگەراندنا ئارامیێ بۆ دەڤەرێن وان و زڤرینا ئاوارەیێن بۆ سەر مال و حالێن خوە، ب پێدڤی و گرنگ هەژمارت.
چەندین پرسێن دی یێن جهێ گرنگییا هەڤپشك، تەوەرەكێ دی یێ كۆمبوونێ بوو.
