جەعفەر ئێمینكی: پێكهاتێ ئێك پاكێج داهێنانەكا خرابە و دێ دیسا پارتی سەركەڤیت
دیدار/ دلۆڤان ئاكرەیی
ئەندامەكێ سەركردایەتییا پارتی دیموكراتی كوردستان ل دۆر پێشڤەچوونێ د دۆزا پەرلەمانی و حوكمەتێ و پێكهاتێ ئێك پاكێج ژ ئالیێ ئێكەتیێ ڤە دیاركر، ئەڤ دۆزە داهێنانەكا خرابە و ل جهێ خۆ نینە و ئاماژەكركو باوەر ناكەت ب راستی مەبەستا وان ئەڤ چەندە بیت، بەلكو مەبەستا وان زێدەتر ئێشاندن و ئەزیەتدانا پارتی یە و گۆت ژی: هەكە ئێكەتی خۆ ب هەڤپشك بزانیت، دڤێت بهێتە پێش و رامانێ بدەتە وێ هەڤپشكیێ و بلا د هەلبژارتنان دا زیرەك بن و كورسیێن باش ب دەست خۆ ڤە بینن، ئەڤجا داخوازییا هەر تشتی بكەن و مافێ خۆ ب ڕەوا بخوازن و ئەو پلانێن پارتی بۆ ئاڤاكرنا كابینەیا نوو داناین دێ دیسان سەركەڤن و پارتی دێ چیتە سەرێ لیستی، چونكی پێگەهێ سەرۆكێ هەرێمێ، سەرۆكێ جڤاتا وەزیران و پۆستێن مەزن و گرنگ دێ هەر بۆ پارتی بن.
جەعفەر ئێمینكی، ئەندامێ سەركردایەتییا پارتی دیموكراتی كوردستان دەربارەی رێككەڤتنا د ناڤبەرا ئێكەتی و نەوەی نوێ دا، ئاشكراكر، پارتی چو دەرگەه نەگرتینە، بەلكو ئەو برادەرێن ئێكەتیێ نە یێن كو دەرگەه گرتین دڤێت ئەو بخۆ ڤەكەن و گۆت ژی پێدڤییە ئێكەتی دەست ژ وێ هەڤپەیمانییا تەكتیكی ل گەل نەوەی نوێ بەردەت، چونكی كارێ پێتڤی یێ كو پارتی بۆ ئێكەتیێ دكەت، نەوەی نوێ بۆ ناكەت.
ل دۆر بابەتێ هەلبژارتنێن پێشوەخت، دیاركر كو ئەڤ چەندە نوكە د ئارادا نینە و ل جهێ خۆ نینە، چونكی هەكە نوكە هەلبژارتن بهێنە كرن، ب پشتگرێدای ڤە دانپێدان ب ئەنجامان وەك پێتڤی نابیت.
ل دۆر پەیڤ و دەستەواژەیا خۆدەستدانێ ئێمینكی گۆت: پارتی دڤێت یا ڕژد و پێداگیر بیت ل سەر مافێن خۆ وەك سەركەڤتییا ئێكێ، چونكی دیموكراسی ل دەڤ پارتی تنێ مافە، نە پلەیە و نە پۆستە.
ل دوماهییێ ئاماژە ب هەلوەستێ رێبەرایەتییا پارتی كر و گۆت: سەرۆك بارزانی دخوازیت ل گەل ئێكەتیێ بگەهینە ئەنجامەكێ راستگۆیانە و راشكاوانە و بجهكری و كۆنكریت و كریاری و ئەڤە ژی ل دەڤ وان ل بەری هەموو كار و ئەولەویەتەكێ دایە .
