حوكمەتا هەرێمێ ب كریار، ژیانا مەسیحییان ل سەر ئاخا وان پێش دئێخیت
وەزیرێ گەهاندنێ و سكرتێرێ گشتی یێ هەڤپەیمانییا مەسیحی ل هەرێما كوردستانێ، د كۆمبوونا كۆمەلا پەرلەمانییا نێڤدەولەتی یا ئۆرسۆدۆكسان ل فینلاندا دا راگەهاند: «هەرێما كوردستانێ ب سیاسەتێن خۆ یێن حەكیمانە، ئەزموونەكا بێوێنە و دەستەبەركەرەكا راستەقینەیە بۆ پاراستن و مانەڤەیا مەسیحییان ل رۆژهەلاتا ناڤین.»
ئانۆ جەوهەر عەبدۆكا د پەیڤەكێ دا ل هێلسینكی پایتەختێ فینلاندا كو نوونەرێن 26 وەلاتان تێدا بەرهەڤ بوون، باسێ رەوشا مەسیحییان ل رۆژهەلاتا ناڤین كر و دوپات كر كو كوردستان نموونەیا هەرە بلند یا خۆراگریێ یە. ناڤبری ئاماژە ب رۆلێ دیرۆكی یێ سەرۆك مەسعود بارزانی كر، كو مەسیحی وەك هەڤپشكێن نیشتمانی دیتینە، نە وەك مێهڤان.
عەبدۆكا گوتنا سەرۆك بارزانی یا كو گۆتی «یان پێكڤە دژین و پێكڤە شەڕی دكەین، یان پێكڤە دمرین» ب بیرئینا وەك ژێدەرێ باوەرییا خێزانێن مەسیحی. هەروەسا دیتنا سەرۆكێ حوكمەتا هەرێمێ مەسرور بارزانی بلند هەلسەنگاند ، كو ب رێكا پشتەڤانییا كەنیسەیان، قوتابخانەیێن ب زمانێ سریانی و پڕۆژەیێن ئاكنجیبوونێ، دڤێت ژیانا مەسیحییان ل سەر ئاخا وان یا باب و باپیران بهێزتر بكەت.
وەزیرێ گەهاندنێ، عەنكاوە وەك نموونەیا زیندی یا پێكڤەژیانێ ئینا و دیار كر: «عەنكاوەیا سالا 1991 كو تنێ دوو كەنیسە تێدا هەبوون، ئەڤرۆ ب پشتەڤانییا حوكمەتا هەرێمێ بوویە خودانا 17 كەنیسەیان ل گەل زانكۆ و نەخۆشخانە و قوتابخانەیان.» ل دوماهیێ، عەبدۆكا دوپات كر كو پاشەڕۆژا مەسیحییان دڤێت ل سەر بنەمایێ وەلاتیبوونا وەكهەڤ بیت.
