خواندن و شرۆڤەکرنێن ڕەخنەیی»
نیشان بامەڕنی
پەرتووکا ب ناڤێ «ڕۆمان ل دەڤەرا بەهدینان: خواندن و شرۆڤەکرنێن ڕەخنەیی» یا نڤیسکار و ڕۆژنامەڤان (عبدالرحمن بامەرنی) یا کو٣٥ رۆمانێن دەڤەرا بەهدینان ب خوە ڤە گرتی و ئێخستینە ژێر خواندن و شرۆڤەکرنێن ڕەخنەیی، من ژی ب فەر زانی کورتییەکێ ل سەر بوهایێ ڤێ پەرتووکێ بدەمە ناساندن بۆ خەلکێ مە یێ هێژا و ب تایبەت رۆماننڤیسان.
ب ڕاستی ژی پێدڤییا مە گەلەک ب ڤان جۆرە نڤیسینان هەیە. هەر ئەڤە یە ژی یا دهێلت کو نڤیساندنا ڕۆمانێ، ب تایبەت ل دەڤەرا بەهدینان ئاستەکێ بالابەرزتر ب خوە ڤە ببینت. وەسان یا دیارە نڤیسکاری کەدەکا مەزن یا دایە نڤیساندنا ڤێ پەرتووکێ ژ بۆ وان کەسێن ڕۆمانێ دنڤیسن یان ژی حەزا نڤیساندنا رۆمانێ هەبت و خوە پێشدە ببت و زێدەتر د ڤی وارێ نڤیسینێ دا مەلەڤان ببت و ل سەر وان شەنگستەیێن رۆمان ل سەر ئاڤا دبت ڕاوەستت و داهێنانێ تێدا بکەت.
هەلبەت ئەڤ رۆمانێن د ڤێ پەرتووکێ دا هاتینە دەستنیشانکرن، هەر یەک ژ وان ب ئاوایەکێ جودا یا هاتینە نڤیساندن. نڤیسکاری ژ سەرەدەری یا ل گۆر هەر یەک ژ وان ڕۆمانان کری و یەک و یەک داینە بەر خواندن و شرۆڤەکرنێن ڕەخنەیێ. د ڤان شرۆڤەکرن و ڕەخنەیان دا هەری زێدە نڤیسکار یێ ل سەر: شەنگستە، ئاڤاکرن، بابەتێ رۆمانێ، باگراوەندێ نڤیسکاری، زمانێ رۆمانێ، جوگرافییا رۆمانێ، رویدان و بوویەرێن ڕۆمانێ، تەکنیک و شێواز و ڤەگێڕانا رۆمانێ، کەسایەتی یان ژی کارەکتەرێن رۆمانێ، وێنە و تابلۆیێن د رۆمانێ دا، پەیاما رۆمانێ، یاریکرن ب پەیڤان، کۆدێن رۆمانێ، ، پەرەگرافێن د رۆمانێ دا، تەوزیفکرن د رۆمانێ دا و نڤیسەرێن ڤان رۆمانان ڤییایە مە کیڤە ببەن، هەتا بەحسێ سێکس و خەبەر و جڤینان د رۆمانێ دا کریە و هەروەسان خواندنا وی ب خوە بۆ رۆمانێ و چاوانییا ئەنجامێن رۆمانێ شرۆڤە و ڕەخنە کرینە. هەلبەت ژ بلی ڤان هەمیان ژی نڤیسەری ب ئاوایەکی بەرچاڤ؛ بیر و بۆچوون و دیتن و تێبینیێن خوە ل گۆر هەر یەک ژ وان رۆمانێن د پەرتووکێ دا، یێن ئیناینە زمان.
من وەکی خواندەڤانەکی کو ئەڤ پەرتووکە یا خواندی و رۆمانەکا من ژی جهێ خوە یێ تێدا کری و سۆدەکێ مەزن یێ ژ خواندنا ڤێ پرتووکێ وەرگرتی. لەوما ژی ب دیتنا من پێدڤی یە هەر کەسەکێ رۆمانێ دنڤیست یان ژی حەزا نڤیساندنێ هەبت، بلا ڤێ پەرتووکێ بخوینت، بێگۆمان دێ سودەک و ئاڤاکرنەکا باش ل سەر نڤیساندنا رۆمانێ ب دست خوە ڤە ئینت. یا کو بالا من کێشای کو ئەز ب کورتی ژی بت ل سەر ڤێ پەرتووکێ بنڤیسم، تەنێ ئەوە، پدڤییا مە ب نڤیسێن هوسان هەیە، ئانکۆ شرۆڤەکرن و ڕەخنەیێن ئاڤاکەر وەک نڤیس زێدە ببن، دا کو نڤیسینا رۆمانا کوردی بەرەف ئاستەکێ دی ڤە ببەین و جهێ خوە د جیهانگیرییا رۆمانێ دا بکەت.
ل دوماهییێ ئەز دەستخوەشییەکا مەزن ل نڤیسکارێ ڤێ پەرتووکێ دکەم. لێ نە وەک ڕەخنە، بەلکو ب دیتنا من شرۆڤەکرنەکا ڕخنەیی بۆ ٣٥ ڕۆمانان کارەکێ مەزنە. خوەزی نڤیسکارێ هێژا دەمەکێ زێدەتر دابا خوە و بەرفرەهتر ل سەر ڤان ڕۆمانان ڕاوەستییا با، دا کو مە زێدەتر مفا ژ ڤان شرۆڤەیێن ڕەخنەی وەرگرتبان؛ ژ بەرکو، وەکی من ئاماژە پێ دای، پێدڤییا مە گەلەک ب ڤان کارێن ڕەخنەیی هەیە.
