خولا كوردستانێ دێ ب پشكداریەكا لاواز بڕێڤەچیت
چاڤەڕێ دهێتە كرن ل چارشەمبییا بهێت دەست ب وەرزێ نوو یا خولا باسكێت بۆلا نایابا كوردستانێ ل سەر ئاستێ پێشكەفتیان بهێتە كرن، پشتی ڤەقەتیانەكا درێژ ئەوا دێ ب پشكداریەكا لاواز ژ پێنج یانەیێن كوردستانێ ل باژێرێ زاخۆ هێتە كرن.
د داخویانیەكێ دا هشیار دۆبانكی جێگرێ سەرۆكێ فدراسیۆنا باسكێت بۆلا كوردستانێ دیار كر خولا نایاب دێ ل 28ێ ڤێ مەهێ هەتا دەستپێما مەها بهێت ب پشكدارییا پێنج یانەیان بەردەوامبیت ئەو ژی هەر ئێك ژ یانەیا زاخۆ مێڤاندارا خولێ، گارە، سایبس، دەربەندیخان و سۆلاڤا نوو، ئەوا دێ یاریێن وان ب شێوەیێ خرڤەبوون هەموو ل هۆلا گرتییا بنگەهێ وەرزش و لاوان ل ئیدارەیا سەربەخوەیا زاخۆ هێتە كرن، یانەیا زاخۆ وەكو سپۆنسەر و هاریكارا ڤەكرنا ڤێ خولێ یە.
ژلایەكێ دووڤە ناڤهاتی گۆت: ل وەرزێ 2024ێ خول هاتبوو ڤەكرن ب پشكدارییا حەفت یانەیان، لێ وەرزێ‌َ ئەڤ سالە ژبەر ئەگەرێن جودا بتنێ پێنج یانە پشكدارن، هەرچەندە ڤەكرنا ڤێ خولێ ب شێوەیێ خرڤەبوونە ئانكو بارێ گران ناكەڤیتە ل سەر مللێن یانەیان، ڤەكرنا خولێ مەرەما مە پتر گرنگی دانە ب ڤێ یاریێ، ئەڤە چەندین سالە پرانییا یانەیێن كوردستانی ئەكادی ڤەكرینە و نەشێن یارییەكا هەڤالینی بكەن، ئەڤ خولە باشترین دەلیڤەیە ژلایێ هەڤڕكییا ناسناڤی و وەرگرتنا پتر شارەزاهییێ، وەكو فدراسیۆنا باسكێت بۆلا كوردستانێ ل دووڤ بەرنامەیێ مە هەموو بزاڤان دكەین سالانە چالاكیەك یان دو چالاكیان ڤەكەین.
