دخوازیت پتر هاریكاریا سترانبێژێن گەنج بهێتە كرن
بێوار حەمدی
ســــــــــــــەفین رەشـــــــید، گەنجەكێ بەهرەمەندێ دەڤەرا خانكێ یە، د دیدارەكێ دا دبێژیت: حەزا من بۆ سترانگۆتنێ بۆ بەری چەند سالان دزڤڕیت و هەر ل دەستپێكێ خێزانا من دگۆتە من دەنگێ تە یێ خۆشە و دێ پشتەڤانێن تە بین، لەورا هندەك جاران دچمە شەهیانان و پتر سترانێن فۆلكلۆری دبێژم، لێ هێشتا دەلیڤە نەهاتیە كو من سترانێن خۆ یێن تایبەت هەبن، لێ دپلانا من دایە هندەك سترانان چێكەم و خزمەتا ستران و مۆزیكا كوردی بكەم.
هەروەسا گۆت: هەر ل دەستپێكێ خێزان بگشتی و دایكا من ب تایبەت گەلەك پشتەڤان و هاریكارێن من بوون، لەورا من دڤێت هیڤیا دایكا خۆ بجه بینم و داخازا من ژ جهێن شۆلەژێ ئەوە پتر هاریكاریا هونەرمەند و سترانبێژان بكەن، ب تایبەت یێن گەنج، دا ئەو ژی پتر گرنگیێ ب بەهرەیا خۆ بدەن و بۆ پاشەرۆژێ من ل بەرە پتر خزمەتا وی خەلكی بكەم یێن كو گوهداریا دەنگێ من دكەن.
