دلین كەمال: ئەكادیمییا شەترەنجێ یاریزانێن باش بەرهەمئیناینە
د داخویانیەكێ دا دلین كەمال ئەنداما كارگێرییا یانەیا دهۆك و سەرپەرشتا تیما شەترەنجێ دیار كر ل دووڤ ئەوێ پلانا هاتییە دانان ب ڕێكخستنا ئەكادیمیەكا تایبەت یا شەترەنجێ تا ڕادەیەكێ باش یا سەركەفتیە و پێشبینییا سەرهلدانا یاریزانێن خودان شیان بۆ ژیێن جودا دهێنە كرن.
زێدەتر ناڤهاتی گۆت: ئێك ژ پێنگاڤێن هەرە گرنگ ئەوبوو ئەم ئەكادیمیەكا تایبەت بۆ یارییا شەترەنجێ ل باژێرێ دهۆكێ ڕێكبێخین و مەرەما سەرەكی ژی هەر ئەو بوویە ڤەگەڕاندنا ناڤودەنگی و هێزا ڤێ یاریێ ل باژێرێ دهۆكێ یە و هەڤڕكی بۆ ڕێزێن پێشیێ یێن ئیراقێ و دەرڤە، بڕێیا ئەڤێ ئەكادیمیێ و ڕێژەیا باش یا یاریزانان ئەم شیان قارەمانییا ئیراقێ ل دهۆكێ مێڤان بكەین و چەند ڕێزبەندیێن باش ژی ب دەستخوەڤە بینن، ژ وانا ئاڤا ئاشتی بۆ ژیێن هەشت سالی و هەروەسان ڕاما بێكەس ل سەر ژیێ 12 سالی یا سێیێ هات، ئاستەكێ مەزن نیشان دابوو.
هەروەسان ناڤهاتی گۆت: ب هەڤكاری دگەل فدراسیۆنا شەترەنجا پارێزگەهێ ئەم هەموو بزاڤان دكەین پتر دەلیڤە بۆ یاریزانێن مە پەیدابن و هەبوونا ڕاهێنانان بەردەوامە، هەتا نوكە نێزیكی 25 یاریزانێن كچ و كوڕ هەنە و گەشبینن د پاشەرۆژەكا نێزیك دا یان ژی د قارەمانیێن بهێت دا پشكداری زێدەتر لێبهێت و یاریزانێن مە باشتر دیاربن، ئەو بەرنامەیێ هاتیە دانان ژلایێ ڕاهێنەرێن ئەكادیمیێ هەتا نوكە سەركەڤتییە.
ل دووماهییێ دلین كەمال گۆت: ئەم دێ بەردەوامبین ل سەر پلانا خوە و ل سەر ڕێبازا بابێ خوە ئەوێ ب هەموو شیانێن خوە كار كری بۆ خاترا پێشئێخستنا یارییا شەترەنجێ ل پارێزگەهێ و زاروویێن خوە گەهاندینە قارەمانیێن نێڤدەولەتی و گەهاندینە ماستەرێ، یا د شیان دا بیت دێ بەردەوامبین.
