دهۆك دەست ڤالا ڤەگەڕیا و سكالا تۆماركر و هەولێر بۆ یارییا چوارێ یە بێ سەركەفتن
قەیس وەیس:
هەردو یانەیێن دهۆك و هەولێر نەشیان سەركەفتنێ د یاریێن خوە یێن گەڕا 12ێ دا بینن و جەماوەرێ خوە ب خەمگینی ژ یاریگەهێ ڤەگەڕنە مالێن خوە، ئەوا ژ چارچووڤەیێ هەڤڕكیێن خولا ستێرێن ئیراقێ یا فوتبۆلێ هاتینە كرن.
خولەكا دووماهیێ دربەكێ ژ نشكەكێ ڤە بوو
جەماوەر و پشتەڤانێن یانەیا دهۆكێ هوسا هزر دكر یارییا تیما وان بەرانبەر یانەیا ئەلگەرمە دێ بێ گۆل ب دووماهی هێت و خالەكێ ڤەگەڕن لێ ژ نشكەكێ ڤە مەروان حەمدی د خولەكا 90+1 یا یاریێ گۆلەكا كۆژەم ل سەر تیما دهۆكێ ئینا و نەهێلا ب خالەكێ ژی ڤەگەرن، ب ئەڤی ئەنجامێ دهۆك ب 15 خال ڕێزا نەهێ ما و دبیت گوهۆڕین ژی پەیدابن كو ژ سەرجەمێ سێ سەركەفتن، شەش وەكهەڤی و ئەڤە بوونە دو خوسارەتی، ژلایێ خوەڤە یانەیا ئەلگەرمە جهێ خوە ل سەرێ لیستێ پاراست ب كۆمكرنا 24 خالان ژ هەشت سەركەفتن، سێ وەكهەڤی و ئێك خوسارەتی هەیە.
دهۆكێ سكالا تۆماركر
لدووڤ ژێدەرێن نێزیك ژ یانەیا دهۆكێ كو ب شێوەیەكێ فەرمی یانەیێ سكالایەك ل فدراسیۆنا فوتبۆلا ئیراقێ دژی ڕاهێنەرێ یانەیا ئەلگەرمە موئمن سلێمان تۆماركریە ئەوێ ب بڕیارەكا دێسپلینێ بۆ سێ یاریان هاتییە سزادان لێ د یارییا بەرانبەر دهۆكێ دا وەكو ڕاهێنەر تیما خوە ب ڕێڤە بربوو، لدووڤ ڕێنومایێن فدراسیۆنا فوتبۆلا ئیراقێ هەكە ڕاهێنەرك یێ سزادایی بیت ب نە ئامادەبوونێ دناڤ یاریگەهێ دا و رۆژا یاریێ دناڤ یاریگەهێ دا سەرپەرشتییا تیما خوە بكەت، دێ ب توندی هێتە سزادان و تیما وی ب سێ گۆلان بێ بەرانبەر تووشی خوسارەتیێ بیت.
یاریزانێ دهۆكێ لێبۆرینێ دخوازیت
پشتی ب دووماهی هاتنا یاریێ د پرێس كۆنفرانس دا حەسەن عیماد یاریزانێ تیما یانەیا دهۆكێ داخواز لێبۆرینێ ژ پشتەڤانێن یانەیا دهۆكێ خواست و گۆت: هەرچەندە ئەم هاتبوونە دناڤ یاریگەهێ دا و هەموو ئارمانجا مە سێ خالێن یاریێ و سەركەفتن بوو، لێ ئەڤە تەپاپێی یە پێشبینییا هەر ئەنجامەكی دهێتە كرن، ئەم دنیڤا ئێكێ دا گەلەك باشتر بووین و ئاستەكێ باش مە نیشان دا، لێ تیما بەرانبەر ژی ئێك ژ تیمێن بهێزە و خودانا سەرێ لیستێ یە، دڤێت خەمۆكی و ئەنجامێ ڤێ یاریێ پشتگوه پاڤێژت و بكەینە وانە بۆ یارییا بهێت ئەم قەرەبوو بكەین و دوبارە دلێ جەماوەرێ خوە خۆش بكەین.
كلاسیكۆیا كوردستانێ ب وەكهەڤی دەربازبوو
تیما یانەیا هەولێرێ دو خالێن دی ژی ژ دەستدان پشتی بەرانبەر یانەیا غاز ئەلشیمال یا كەركووكی ب گۆلەكێ وەكهەڤ بووی، د یارییا واندا ئەوا ل یاریگەها شەهید فرانسۆ حەریری ل هەولێرا پایتەخت هاتیە كرن، هەردو گۆل د نیڤا ئێكێ دا هاتبوونە تۆماركرن، بڤی ئەنجامی تیما پایتەختی زێدەتر پاشڤە چوو د ڕێزبەندیێ دا ل ڕێزا پێنجێ پاشڤە چوو ڕێزا حەفتێ و 19 خال كۆمكرینە ژ پێنج سەركەفتن، چار وەكهەڤی و سێ خوسارەتیان، ژلایێ خوەڤە غازئەلشیمال 15 خال كۆمكرین ب سێ سەركەفتن، شەش وەكهەڤی و سێ خوسارەتیان ل ڕێزا 11ێ دهێت.
