ئەیهەم جامی: سزایێن فدراسیۆنێ د گرانن و دێ پێنگاڤ بۆ کێمکرنا وان هێنە هاڤێتن
عایشا عەجیب
د دیدارەکێ دا ئەیھەم جامی سەرۆکێ یانەیا باتیفا دلگرانیا خوە بەرامبەر سزایێن فیدڕاسیۆنا فوتبۆلا کوردستانێ بەرانبەر یانەیا وان دیار و گۆت: سزایێن فیدڕاسیۆنێ ل سەر مە دگرانن و زیانەکا مەزن دێ ل پشتخوە هێلیت تایبەت بۆ یانەیەکێ بۆ جارا ئێکێ یە دهێتە خولا پلا ئێکا کوردستانێ، هیڤیدارین پێداچوون ب بڕیارێن خۆ دا بکەن.
زێدەتر ناڤھاتی گۆت: هەمی دەما هاریکار و پشتەڤانێن فیدڕاسیۆنێ نە دا پێخەمەت هیچ توندوتیژیەک پەیدا نەبیت و نەبیتە بارگرانی بۆ مە و فدراسیۆنێ، پێنەڤێت هەر بڕیارەکا ئەو دەربکەن بێی دودلی دێ جێبەجێ کەین، چونکی ڕێنوما و یاسایێن وان بۆ هندێ نە وەرزش ب شێوەیەکێ جوانتر بڕێڤەبچت، تنێ داخوازییا مە ئەوە بڕیار بۆ هەردو لایان وەکو ئێکبن.
ئەیھەم جامی گۆت ژی: مخابن سزایێن ل سەر مە گرانن، ب تایبەت سێ یاری ژ دەرڤەی یاریگەها مە دێ بنە بارگرانی و نەخۆشی بۆ یاریزانان ئەڤە ئێکەم جارە یانەیا باتێفا دەربازی خولا پلە ئێکا کوردستانێ دبیت و هێشتا بۆ خولێ بەرهەڤ دکەین لەوما پێدڤی ب پشتەڤانیێ نە نەکو سزایێن مەزنین.
ژلایەکێ دووڤە ناڤهاتی ئەوچەندە ژی دیار کر بۆ وەرزێ نوو دێ هەموو بزاڤان کەن باشترین شێوە بەرهەڤیان بکەن، لێ گرنگ ئەوە ئەم پشتەڤانییا دارایی کۆمبکەین بۆ هندێ بزانین دێ چەوا دەست ب پلانێن خوە کەین بۆ وەرزێ نوو، لەوما ژی دێ مە سەرەدانێن بەردەوان هەبن بۆ جهێن پەیوەندیدار پێخەمەت وەرگرتنا پشتەڤانیێ، گەشبینم وەرزێ بهێت یانەیا باتیفا دێ بیتە هژمارەکا بزەحمەت د خولێ دا، سەرباریی تاقیکرنا ما یا ئێکێ یە، وەرزێ بۆری ب سانەهی نەبوو ب کارەکێ کۆم هاتە کرن، لێ وەرزێ ئەڤ سالە دێ بزەحمەتر بیت و شێواز جوداتر بیت.
لدووماھیێ سەرۆکێ یانەیێ گۆت: ئەم دێ سەرەدانا فدراسیۆنا فوتبۆلا کوردستانێ کەین دا کو پێداچوونەکێ ب بڕیارا خۆ بکەن و سزا لەسەر مە بهێنە کێمکرن، ئەم دخوازین پشتەڤان و هاریکارێ مە بن بۆ هندێ کو کارەکێ جوانتر ب ڕێڤە بچت، دوپات دکەین هەر سزایەک هەبیت دێ یاسا و رێنماییێن فدراسیۆنێ جێبەجێ کەین.
بۆ زانین دەرئەنجامێ روودانێن یارییا باتیفا و حاجیاوا ژ فینالا خولا پلا دو یا کوردستانێ فدراسیۆنا فوتبۆلێ چەند بریار دەرکربوون و بڤی شێوەیی بوون.
– سزادانا هاریکارێ ڕاهێنەرێ یانەیا باتیفا ئاشتی عومەر بۆ ئێک وەرز، ل گەل کۆژمەیێ ئێک ملیۆن دینار.
– ژبەر دوبارەبوونا سەرپێچیێ یانەیا باتیفا هاتە سزادان ب سێ یاریان ژ دەرڤەیی یاریگەها خوە و بێ پشتەڤان، سزایێ دارایی ب سێ ملیۆن دیناران.
– سزادانا یانەیا حاجیاوا ب ئێک یاری ژ دەرڤەیی یاریگەها خوە و بێ پشتەڤان و ب کۆژمەیێ دارایی ملیۆنەک و پێنج سەد هزار دیناران.
