دهۆك ل بن گڤاشتنێن پشتەڤانێن خوە دێ بزاڤێن ڤەگەڕاندنا سەركەفتنان كەت
چاڤەڕێ دهێتە كرن ئەڤرۆ ژی پێنج یاریێن دی ژ چارچووڤەیێ هەڤڕكیێن گەڕا 26ێ ژ خولا ستێرێن ئیراقێ یا فوتبۆلێ بهێنە ئەنجامدان، دهۆك دێ لبن گڤاشتنێن پشتەڤانێن خوە بزاڤێ كەت سەركەفتنێن خوە ڤەگەڕینت و هەولێر ژی داخوازكرییە بۆ سێ خالان.
بڕیارە ئەڤرۆ ل دەمژمێر شەشی ئێڤاری تیما یانەیا دهۆك د ناڤ ئەرد و پشتەڤانێن خوە دا مێڤاندارییا یانەیا حدود یا بەغدایی بكەت د یارییەكا ب سانەهی نابیت بۆ ئەلهۆیێن چیا ئەوێن د نوكە دا ب شێوەیێ بەروەخت ب 39 خالان رێزا شەشێ دهێت و مێڤانا وێ 36 خال كۆمكرینە و رێزا نەهێ دهێت، د ڤێ یاریێ دا یاریزانێن دهۆكێ داخوازكرینە بۆ سەركەفتنێ و قەرەبوویا ئەنجامێ نە باش یێن یاریا بوری بكەن ئەوا دو خال دگەل تیما ئەمانەت بەغدا د خولەكێن دووماهیێ ژ دەستداین، ڤەگەڕیانا پشتەڤانان بۆ ناڤ یاریگەهێ دێ هێت پشتی د دو یاریێن بۆری یێن دهۆكێ بێ جەماوەر دگەل كەرخ و نەفت ئەلوەسەت یاری كرین ب وەكهەڤی هاتین، ئەڤچەندە بوویە دلگرانییا پشكەك ژ پشتەڤانێن یانەیێ ئەوێن داخواز دكەن یارییا ئەڤرۆ دڤێت بهێتە قەرەبووكرن و ڤەگەڕنە سەركەفتنان، هەكە ئەنجامێن خراب بەردەوامبیت دوور نینە راهێنەرێ تیمێ ئەحمەد خەلەف دەست ژ كارێ خوە بكێشیت، لێ هەمی بۆچوون هوسا دهێنە دیاركرن دبیت یارییا ئەڤرۆ ئاشتكرنا جەماوەری بیت.
ژلایێ خوەڤە تیما یانەیا هەولێر دێ ل یاریگەها شەهید فرانسۆ حەریری ل دەمژمێر شەشێ ئێڤاری مێڤاندارییا یانەیا مینا یا بەسرایی بكەت، رەوشا تیما كەلهە و منارە یا باش نینە ئەوا ب 23 خالان رێزا 16ێ دهێت و دێ بزاڤێ كەت ئێدی ژ دەستدانا خالان بهێتە راوەستاندن بەرانبەر یانەیا بەسرایی ئەوا 27 خال هەین و رێزا 13ێ دهێت، سەركەفتنا ئەڤرۆ دێ گوهۆڕینا دەرۆنی و رێزبەندیێ بۆ تیما پایتەختێ كوردستانێ پەیداكەت.
ژ یاریێن دی، جەوییە- كەرخ، یاریگەها ئەلشەعب دەمژمێر 8:15 شەڤ، تەلەبە- ئەمانەت بەغدا دەمژمێر 3:45 ئێڤاری ل هەمان یاریگەهـ، یانەیا نەفت- نەفت ئەلمیسان یاریگەها ئەلمەدینە.
