ل سەر ئاستێ زانكۆیێن حكومی ل ئیراقێ و كوردستانێ زانكـۆیا زاخـۆ بـوو یا ئێكێ
زاخۆ، دلۆڤان هالۆ:
زانكۆیا زاخۆ ڕێزا ئێكێ ل سەر ئاستێ زانكۆیێن حكومی ل ئیراق و هەرێما كوردستانێ ب دەستڤەئینا، د دەمەكی دا، كو د ڕێزا دویێ دایە ل سەر ئاستێ زانكۆیێن حكومی و نەحكومی یێن ئیراقێ یێن د ڕێزبەندا جیهانی دا هاتینە تۆماركرن.
ئەڤ دەستكەفتە پشتی وێ چەندێ هات، كو زانكۆیا زاخۆ د ڕێزبەندیا جیهانی دا د ناڤبەرا 1001و 1200ێ دا جهێ خۆ گرت، ب ڤێ چەندێ پێشكەفتنەكا گرنگ ل پێگەهێ خوە ل سەر ئاستێ نیشتیمانی و ناڤنەتەوەیی پشتڕاست دكەت.
ئەڤ پێشكەفتنە ڕەنگڤەدانا پێشكەفتنا بەرچاڤە د ئاستێ ئەكادیمی و ڤەكۆلینێن زانستی یێن زانكۆیێ دا، ب تایبەتی د بیاڤێ كوالیتیا ڤەكۆلینێن زانستی دا، ل گەل بزاڤێن بەردەوام بۆ پشتەڤانیكرنا ڤەكۆلینێن زانستی و بلندكرنا كوالیتیا خواندنێ و بهێزكرنا ئامادەبوونا ئەكادیمی و ڤەكۆلینێ یا زانكۆیێ ل سەر ئاستێ ناڤخوە و ناڤنەتەوەیی.
دیسا ئەڤ دەستكەفتە پێگەهێ پێشڤەچوونێ یێ زانكۆیا زاخۆ د ناڤ دامەزراوەیێن خواندنا بلند ل ئیراق و هەرێما كوردستانێ دا پشتڕاست دكەت، دبیتە هاندەرەك بۆ بەردەوامیدان ب كارێ بەر ب دەستڤەئینانا ڕێزێن پێشكەفتیتر و بهێزكرنا ئامادەبوونا زانكۆیێ د ڕێزبەندیێن جیهانی دا.
ڕێزبەندیا جیهانی یا سالا 2027ێ پتر ژ دو هزار و 297 زانكۆیان ژ 118 وەلات و هەرێمان ب خوە ڤە دگریت، د هەلسەنگاندنا زانكۆیان دا پشتبەستنێ ب كۆمەكا پێشاندەرێن سەرەكی یێن كو فێركرنێ و ژینگەها ڤەكۆلینێ و كوالیتیا ڤەكۆلینا زانستی و هەڤكاری ل گەل كەرتێ پیشەسازی و ناڤنەتەوەیی بخوەڤە دگرن.
