بهایـێ یەكەیێن ئاكنجیبوونێ ناهێتە گرانكرن
هەولێر، قائید میرۆ:
بەرپرسەكێ دەستەیا گشتی یا وەبەرهێنانێ ئاشكراكر، بهایێ یەكەیێن ئاكنجیبوونێ ناهێتە گرانكرن و دبێژیت: ئەو پڕۆژەیێن مۆهلەت ل وەبەرهێنانێ هەی، نەشێن بیێ دەستەیا وەبەرهێنانێ بهایێ یەكەیێن خۆ بلند بكەن.
پشتیوان حەمە سەدیق، رێڤەبەرێ باژێڕ و دەڤەرێن پیشەسازی ل دەستەیا وەبەرهێنانێ بۆ رۆژناما ئەڤرۆ دیاركر، راستە بۆ دەمێ چەند رۆژانە بهایێ كەلوپەلێن ئاڤاهیان ب شێوەیەكێ بەرچاڤ بلندبوویە و گۆت: «گرانبوونا بهایێ كەلوپەلێن ئاڤاهیان كاریگەری لسەر بازاڕی هەیە، چونكی هندەك ژ وان كەرەستەیێن ئاڤاهیان بهایێ وان گەلەك گران بوویە، بەلێ كاریگەریێن زۆر لسەر یەكەیێن ئاكنجیبوونێ یێن سەر ب دەستەیا گشتی یا وەبەرهێنانێ ڤە نابیت، چونكی بەری مۆهلەت ب هەر پڕۆژەكی بهێتەدان، بهایێ وان دهێتە دیاركرن».
پشتیوان حەمە سدیق گۆت ژی: «ئەو یەكەیێن نوكە مۆهلەت هەی، یان ژی كار تێدا دهێتە كرن، دێ هەروەكی خۆ مینن و گران نابن، چونكی بهایێ وان بێی رێڤەبەریێن وەبەرهێنانێ ناهێتە گوهۆڕین، هەر دەستكاریەكا بهێتە كرن، بەروڤاژی بڕیار و مەرجێن وەبەرهێنانێ یە، ئەگەر بهایێ یەكەیان ژی بهێتە گوهۆڕین دڤێت ب هەماهەنگی ل گەل دەستەیا وەبەرهێنانێ بیت».
