دهۆك و زاخۆ دێ بزاڤێ كەن ب سەركەفتن ژ دەرڤەیی یاریگەهێن خوە ڤەگەڕن
قەیس وەیس:
پشتی ب دووماهی هاتنا یاریێن گەڕا 23ێ ژ هەڤڕكیێن خولا ستێرێن ئیراقێ یا فوتبۆلێ تیما یانەیا دهۆك بۆ یارییا دویێ ل دووڤ ئێك مفا ژ ئەردێ خوە وەرنەگرت و زاخۆ دڤێ گەڕێ دا یارییا وێ هاتبوو پاشئێخستن ژبەر پشكدارییا كۆمەكا یاریزانێن جەوییە دگەل هەلبژارتیێن ئیراقێ.
ئەنجامێن دهۆكێ د لاوازن
تیما تەپا پێی یا یانەیا دهۆك بەردەوامە ل سەر ئەنجامێن لاوازن ژ سەرجەمێ سێ یاریێن بۆری دا سێ وەكهەڤی ئیناینە ژ وانا هەردو یاریێن د ناڤ ئەردێ خوە دا دگەل یانەیێن كەرخ و نەفت ئەلوەسەت و بەری وان یارییا دێربییا پارێزگەهێ دگەل زاخۆ بێ گۆل وەكهەڤبوون، ئەڤ ئەنجامە بوویە جهێ نەرازیبوونا كارگێرییا یانەیێ و جەماوەرێ وێ ئەوێن پشكەكا وان دخوازن راهێنەرێ تیمێ ئەحمەد خەلەف بهێتە دوورئێخستن.
د پرێسكۆنفرانسەكێ رۆژنامەڤانی دا عەلی وەهیب هاریكارێ راهێنەرێ دهۆكێ ئەگەرێ ژ دەستدانا خالان ب نە بەرهەڤبوونا جەماوەری و هەبوونا خەلەتییان ژلایێ یاریزانان سەرباری ژ دەستدانا چەندین دەلیڤەیان، د بەرانبەر دا ئەیسەر قاسم یاریزانێ تیمێ هنگاڤتنا كۆمەكا یاریزانان ئەگەرەێ دی دا زانین.
ل دووڤ ئەنجامێن لاواز و نەرازیبوونا جەماوەرێ یانەیێ دهێتە پێشبینیكرن یارییا بهێت یا تیما دهۆكێ بەرانبەر ئەلقاسم ژ چارچووڤەیێ گەڕا 24ێ ئەوا دێ ل ئەینییا بهێت ل یاریگەها كۆت هێتە كرن ببیتە دووماهی دەلیڤە بۆ راهێنەر ئەحمەد خەلەف ژبۆ باشتكرنا ئەنجامێن تیمێ و ڤەگەڕیان بۆ رێزێن پێشیێ كو د دەمەكی دا تیما دهۆكێ ل رێزا چارێ بوو د نوكە دا پاشڤە چوویە رێزا شەشێ و دبیت هێش پاشڤە بچیت ئەوا نوكە 35 خال كۆمكرین ژ نەهـ سەركەفتن، هەشت وەكهەڤی و شەش خوسارەتی هەنە، یارییا بهێت یا تیما دهۆكێ دێ بزاڤێ كەت ڤەگەڕیتە ئاوازێن سەركەفتنا و ڤەگەڕاندنا زلهێزییا خوە.
تیما یانەیا زاخۆ یارییا گەڕا 23ێ بەرانبەر جەویە ئەنجامنەدا ئەوا د دەمەكێ باش دەرباز دكەت كو خودانا 37 خالانە ژ نەهـ سەركەفتن، 10 وەكهەڤی و سێ خوسارەتییان رێزا سێیێ دهێت لێ دێ پێشوەخت پاشڤە چیتە رێزا چارێ، یارییا بهێت یا كوڕێن خابوری دێ سوبەهی ل باژێرێ بەغدا بیتە مێڤانا یانەیا كارەبا د یارییەكا ب هێز و گرنگ دا، د داخویانیەكا بەری دو هژمارەیێن رۆژناما ئەڤرۆ دا یانەیا زاخۆ دیاركربوو كو پاشئێخستنا یارییا وان دگەل جەوییە یا باش نەبوو وەكو یاری ژبەركو ئەنجامێن تیما جەوییە دباش نەبوون و رەوشا مە باشتر بوو و دەلیڤەكا گرنگ بوو سەركەفتنێ بیین.
ژلایێ خوەڤە تیما یانەیا هەولێر بەردەوامە ل سەر ئاست و ئەنجامێن خوە یێن لاواز و نەشیاییە بۆ یارییا شەشێ ل دووڤ ئێك چ سەركەفتنان ب دەستڤە بینت، پشتی د گەڕا بۆری دا بەرانبەر مێڤانا خوە و خودانا سەرێ لیستێ یانەیا شورتە ب چار گۆلان بەرانبەر دو گۆلان تووشی خوسارەتیێ بووی، د سێ یارییان دا تووشی خوسارەتیێ بوویە و سێ یاریێن دی وەكهەڤی ئینایە، كارگێرییا یانەیێ ئەگەرێن ئەنجامان ڤەدگەڕینتە نەبوونا پشتەڤانییا دارایی و ل دووڤ ژێدەرێن رۆژنامەڤانی ئەڤە نێزیكی دو هەیڤە یاریزانێن وان مووچە نە وەرگرتییە ئەڤچەندە ژی كارتیكرن ل سەر ئەنجامێن وێ كرییە، یانەیا هەولێر یارییا بهێت دگەل تەلەبە ئەنجام نادەت ئەوا بڕیاربوو سباهی هاتبا كرن.
