دووڤچوونا كومسیۆنا هه‌لبژارتان سیاسى یه یان پێشه‌یى یه؟
گومان تێدا نینه كو ژ به‌ر ئه‌و خونیشادانێن هاتینه ئه‌نجامدان ژ لایێ لایه‌نگرێن موقته‌دا ئه‌لسه‌در ڤه ل به‌غدا، ئه‌و ژى كو كومسیۆنا بالا یا سه‌ربخوه‌یا هه‌لبژارتنان تۆمه‌تبار كرى ب گه‌نده‌لیێ و نه‌زه‌لالیێ كو ئه‌ڤ چه‌نده بوویه ئه‌گه‌رێ هندێ، سه‌رۆك و كۆمسیۆنا بالا یا هه‌لبژارتنان بهێنه داخوازكرن ژ لایێ په‌رله‌مانێ عیراقێ ڤه، ئه‌و ژى كو ل رێكه‌فتى17\4\2017، هه‌ر وه‌سا ل رێكه‌فتى25\4\2017 كو د ڤى چارچووڤه‌ى دا چه‌ندین پسیار ئاراسته‌ى سه‌رۆك و كۆمسیۆنا بالا یا هه‌لبژارتنان هاتینه‌كرن، ب تایبه‌تى ژ لایێ په‌رله‌مانتارێن باسكێ سه‌در ڤه، كو دڤ ێ كۆمبوونێ دا قاییلبوون بۆ په‌رله‌مانى چێنه‌بوو، له‌ورا روونشتنا په‌رله‌مانى هاته پاشخستن بۆ 27\4\2017 وه‌ك مه ئاماژه پێ داى كو كومسیۆن و سه‌رۆكێ كومسیۆنێ هاتینه تۆمه‌ت باركرن، ئه‌و ژى كو خه‌مسارى دكار و ئه‌ركێن خوه‌دا كریه. هه‌ر وه‌سا سه‌خته‌كارى دكارتێن د هه‌لبژارتنان دا هاتیه كرن و نه د دادپه‌روه‌رانه بوون سه‌باره‌ت ئه‌و لایه‌نێن پشكدار د هه‌لبژارتنان دا ئانكو تاگیرى كریه. به‌لێ ب دیتن و نه‌رینا من دا كو هه‌تا نوكه كه‌س ژ ڤێ داخوازكرنا په‌رله‌مانى قورتال نه‌بوویه ژ بلى ئیبراهیم جه‌عفه‌رى، وه‌زیرێ ژ ده‌ره‌ڤه یێ عیراقێ ئه‌وژى چنكو شیعه‌یه و خودان مه‌زنترین لایه‌نه د ناڤا په‌رله‌مانى دا كو ئه‌ڤ ئێكه هندێ دسه‌لمینیت، ئه‌و ژى كو هه‌ر كه‌سه‌كێ ل دووڤ فیتكا شیعه‌یان نه له‌یزیت دێ هێته لادان چونكو وه‌ك مه ئاماژه پێ داى پرانیا ئه‌ندامێن په‌رله‌مانێ عیراقێ شیعه‌نه و مه‌زنترین ده‌سته‌كه د ناڤ ڤى په‌رله‌مانى دا. ئه‌م هه‌موو دزانین كو پێكئینانا كومسیۆنێ ل دووڤ ته‌رخانكرنا هه‌مى لایه‌نى یه (مخصصه حزبیه). ئه‌ڤه ژ لایه‌كى ڤه و ژ لایه‌كێ دیڤه كو ده‌ستهه‌لاتا عیراقێ د بن كۆنترولا مالكى و پارتا ده‌عوه ڤه‌یه، ئه‌م هه‌موو دزانین كو ئه‌و ژى جێبه‌جێكه‌رێن رژێما ئیرانێ نه. ئه‌ڤجا دێ بینى زۆربه‌ى ئه‌و كه‌سانێن هاتینه لادان هه‌تا نوكه چ وه‌زیر بیت یانژى كه‌سه‌كێ دى بیت یان سوننه یه یان ژى كورده. یا رۆهن و ئه‌شكه‌رایه كو دێ بهانه‌كێ بۆ ژ بن ئه‌ردى ده‌رئێخن وه‌ك مه دیتى سه‌باره‌ت خالد ئه‌لعوبه‌یدى وه‌زیرێ به‌ره‌ڤانیێ و هوشیار زێبارى وه‌زیرێ دارایێ و دوورخستنا جێگرێ سه‌رۆك وه‌زیران دكتۆر رۆژ نوورى شاویس ئه‌و ژى ب بریاره‌كا دادگه‌ها فیدرالى كود بن كونترۆلا مالكى ڤه‌یه، هه‌ر وه‌سا سه‌رۆك سۆپا سالارێ عیراقێ بابه‌كر زێبارى ب هانه‌یا خانه‌نشینكرنێ ئه‌و ژى كو ماوێ وى یێ یاسایێ ته‌مام بوویه ژ بۆ خانه‌نشینكرنێ و هه‌ر وه‌سا ده‌ركرنا چه‌ند بریاران سه‌باره‌ت تارق ئه‌لهاشمى جێگرێ سه‌رۆك كۆمارى و رافع ئه‌لعیساوى وه‌زیرى دارایێ و سه‌رۆكێ پارتا ئه‌ئوممه میسال ئه‌لئالووس، هه‌ر وه‌سا شێخ حارس ئه‌لزاڕى سه‌رۆكێ جڤاتا زانایێن ئیسلامێ ل عیراقێ كو ناڤبرى ژى ژ به‌ر ڤێ ئێكێ عیراق ب جه هیلابوو و گه‌له‌ك شێخێن عه‌ره‌بان یێن سوننه و..هتد. وه‌ك بۆچوونا من كو ئه‌ڤ داخوازكرنه سیاسى یه و چو كێشه‌كا پپێشه‌یى نینه كو شیعه‌یان دڤێت ئه‌ڤ پۆسته ژى ژ بۆ وان بیت، سه‌باره‌ت سه‌رۆك كومسیۆنێ (سه‌ربه‌ست مسته‌فا ئامێدى) و كۆمسیۆنا بالا یا هه‌لبژارتنان هنده‌ك ده‌ستێن ده‌ره‌كى و ناڤخوه‌یێ ل پشت ڤێ ئێكێ هه‌نه ئیران وه‌ك نموونه، چونكو ئیران خوێیا خوه دكه‌ته د ناڤ هه‌مى گراران و نه‌جهێ باوه‌ریێ یه و مارێ بن گلگله‌یه و ژ حه‌ز و ئاره‌زویێن وى ئه‌وه كو چو ملله‌ته‌ك نانه‌كێ ب ره‌حه‌تى نه‌خۆت و هه‌ر د ڤى چارچووڤه‌ى دا وه‌سا دیاره هه‌كه ئه‌ڤ چه‌نده كه‌فته به‌ر ده‌نگدانێ، دێ سه‌ربه‌ست مسته‌فێ و كومسیۆن هینه ژ كارلادان، چونكو وه‌ك مه ئاماژه پێ داى پشكا شێرى د په‌رله‌مانى دا ب به‌ر عه‌ره‌بان دكه‌ڤیت كو هه‌ر گاڤه‌كا بابه‌ته‌كێ گرێداى كوردان ڤه بیت، وێ گاڤێ دێ شیعه و سوننه خوه كه‌نه ئێك وه‌ك مه دیتى سه‌باره‌ت بلندكرنا ئالایێ كوردستانێ ل كه‌ركووكێ. ئاشكه‌رایه كو ئه‌ڤ لایه‌نێن كه‌ربوكینا كوردان د دلێ وان دا كو هه‌مى هه‌ول و بزاڤان دكه‌ن كو ب هه‌ر ره‌نگه‌كى كوردان لاوازبكه‌ن و ژ مافێن وان یێن ره‌وا بێبه‌هر بكه‌ن و ب تایبه‌تى د ناڤا په‌رله‌مانێ عیراقێ دا كو مه‌ره‌مێن وان ژى مه‌ره‌مێن سیاسینه، ئه‌و ژى كو دا كورد به‌غدا چۆل بكه‌ن كو هه‌تا نوكه ڤان پیلانان سه‌رگرتى یه، ئه‌و ژى سه‌باره‌ت پۆستێن د ده‌ستێن پارتى دیمۆكراتى كوردستان دا ل به‌غدا. هه‌ژى گۆتنێ یه ئه‌و ژى كو د كۆمبوونا په‌رله‌مانى دا ل رێكه‌فتى 25\4\2017 و پشتى هه‌مواركرنا نهێنى هاتیه‌كرن (119) په‌رله‌مانتار ل گه‌ل هندێ دابوون كو كومسیۆن و سه‌رۆكێ كومسیۆنێ نه‌مینن، هه‌ر وه‌سا (118) په‌رله‌مانتار د گه‌ل هندێ دابوون كو كومسیۆن و سه‌رۆكێ كومسیۆنێ بمینن و هه‌روه‌سا (15) ئه‌ندامێن په‌رله‌مانى ده‌نگ نه‌دابوو ئه‌ز ب دوورنادانم كو دێ د كۆمبوونا داهاتى یا په‌رله‌مانى دا دێ باوه‌رى هێته ستاندن ژ سه‌رۆك و كومسیۆنا بالا یا هه‌لبژارتنان و دێ سه‌رۆك و كومسیۆنه‌كا دیتر هێته ده‌ستنیشان كرن و چێدبیت راستڤه‌كرن بهێنه‌كرن د ڤێ دا كو كومسیۆنێ دا و دێ كورد ژ ڤى پۆسته‌ى هێنه دوورخستن كو مه‌ره‌ما وان یا سه‌ره‌كى ژ ڤێ ئێكێ ئه‌ڤه‌یه.
