دڤێت پەیوەندیێن ئیراقێ و هەرێمێ ل گەل ئسپانیایێ بەر ب پێشڤە بچن
نێچیرڤان بارزانی، سەرۆكێ هەرێما كوردستانێ پێشوازی ل عەلی شەمران بالیۆزێ نوو یێ ئیراقێ ل ئیسپانیایێ كر و د دیدارەكێ دا هەردو ئالییان دوپاتی ل سەر بهێزكرنا پەیوەندیێن هەولێرێ و بەغدایێ ل گەل مەدریدێ كر.
د دیدارەكێ دا سەرۆكێ هەرێما كوردستانێ پیرۆزباهییا دەستەكاربوونا بالیۆزێ نوو یێ ئیراقێ ل ئیسپانیایێ كر و هیڤییا سەركەفتنێ بۆ خواست.
ل دۆر ناڤەرۆكا دیدارێ سەرۆكایەتییا هەرێما كوردستانێ راگەهاند كو نێچیرڤان بارزانی دوپاتی ل سەر پێشڤەبرنا پتر یا پەیوەندیێن ئیراقێ و هەرێما كوردستانێ ل گەل ئیسپانیایێ كر ب شێوەیەكێ كو د بەرژەوەندییا هەموو ئالییان دا بیت.
بالیۆزێ نوو یێ ئیراقێ ل ئیسپانیایێ رۆلێ نێچیرڤان بارزانی ل دەڤەرێ بلند هەلسەنگاند و تەكەز ل سەر بزاڤێن زێدەتر بهێزكرنا پەیوەندییان كر دیسان رەوشا ئیراقێ و پێشهاتێن دەڤەرێ تەوەری دی یێ هەڤدیتنا نێچیرڤان بارزانی و بالیۆزێ ئیراقێ بوون و تێدا باسێ چەوانییا بهێزكرنا پەیوەندیێن ئیراقێ و هەرێما كوردستانێ ل گەل ئیسپانیایێ د بوارێن جودا دا هاتە كرن.
