دێ گرنكیێ دەینە كۆمەلگەهـ و گوندان بۆ بجهئینانا پرۆژان
ئەمیر ئەترووشی:
سەرپەرشتێ ئیدارا سەربەخۆیا زاخۆ دیاركر، نوكە پتر گرنگیێ دەینە كۆمەلگەهـ و گوندێن سەر زاخۆڤە بۆ ئەنجامدانا پرۆژەیێن خزمەتگوزاری كۆ گرنگیەكا باش پێ هاتیە دان بۆ دروست كرنا پرۆژان و گۆت:
گۆهدار شێخۆ، سەرپەرشتێ ئیدارا سەربەخۆیا زاخۆ بۆ رۆژنامەیا ئەڤرۆ راگەهاند، د پلانێ دایە كارگەهـ بهێنە دامەزراندن و سایلۆیەك ژی بهێتە چێ كرن و ئەو پێدڤیێن سەرەكی ل كۆمەلگەهـ و گوندان بهێنە چێ كرن و پتر گرنگیێ دەینە چێكرنا جادێن گوندان بۆ وێ چەندێ وەلاتی بشێن ل گوندان كار بكەن و ل سەنتەرێ زاخۆ و باتیفا گەلەك كار هاتیە كرن نوكە ئەم بەرەڤ ناحیان و كۆمەلگەهـ و گوندان چووینە بۆ بجهئینانا پرۆژان .
ئاشكرا كر، دێ پتر گرنگیێ دەینە دەرڤەی باژێری بۆ دروستكرنا جادە و گەهاندنا كارەبێ دا كو خەلك قەستا دەڤەرێن خۆ بكەن و پتر چاندنێ بكەن كوردستان گەلەكا دەولەمەندە ب چاندن و گەشتیاری، ل باتیفا یا سەر ب زاخۆ جهێن گەشتیاریێن سەرنج ڕاكێش هەنە «.
سەرپەرشتێ ئیدارا سەربەخۆیا زاخۆ دیاركر، لسەر راسپاردێن جەنابێ ڕێزدار مەسرور بارزانی سەرۆكێ حكومەتا هەرێما كوردستانێ، بەرێ بنیاتێ پرۆژێن (نووژەنكرنا كانیا دێرەبوونێ، هۆلا لالش و دێرا مارگۆرگیس ل پێشابیرێ و چێكرنا زالگەها ئیدارا سەربەخۆیا زاخۆ) ب گۆژمێ ١،٩٨٦،٢٨٥،٠٠٠ ملیار دیناران هاتە دانان.
سەرپەرستێ ئیدارا سەربەخۆیا زاخۆ راگەهاند، ب سەرۆكاتیا مەسرور بارزانی سەرۆكێ حكومەتا هەرێما كوردستانێ، ئاڤەدانی ل هەموو سنوورێ ئیدارا سەربەخۆیا زاخۆ بەردەوامە، دەستێ وێ ژ بۆ پێشكێشكرنا خزمەتگوزاریان گەهشتییە هەموو ئالییەكێ و بێ جیاوازی.
گۆت ژی:، هەر ژ رۆژهەلاتێ سنوورێ ئیدارا سەربەخۆیا زاخۆ ژ ناحیا بێگۆڤا هەتا دگەهیتە گوندێ پێشابیرێ ل سەر رووباری دیجلەی دێ پرۆژەیێن گەشتیاری هێنە دروستكرن».
چیا ئەمین، رێڤەبەرێ گشتیێ گەشتوگوزارا زاخۆ بۆ ئەڤرۆ راگەهاند، د پلانێدایە هەر ژ رۆژهەلاتێ سنوورێ ئیدارا سەربەخۆیا زاخۆ ژ ناحیا بێگۆڤا هەتا دگەهیتە گوندێ پێشابیرێ سەر رووباری دیجلە پرۆژەیێن گەشتیاری بهێنە دروستكرن و كەرتێ گەشتیاری ل دەڤەرێن جودا جودا ل سنوورێ ئیدارا زاخۆ گەشە بكەت و خەلك مفای ژ هەمی جورێن گەشتوگوزارا وەربگرت و دەلیڤێن كاركرنێ ژی د ڤی كەرتێ دا بەرەف رێژەكا بلند بچیت».
ئاشكرا كر، نوكە ل زاخۆ دەست ب گەشتیاریا ئاینێ هاتیە كرن بۆ ڤێ مەرەمێ ژی كانیا دێربوون كۆ مەزارگەهەكێ ئێزدیان تێدایە دهێتە نووژەنكرن و كەنیسا مارگۆرگیس دهێتە نووژەن كرن و ئەڤ هەردوو جهە دێ بنە جهێن گەشتیاری ل زاخۆ .
رێڤەبەرێ گشتیێ وەبەرهێنانێ ل ئیدارا سەربەخۆیا زاخۆ دیاركر، 11 پرۆژێن وەبەرهێنانێ دگەل قەتەر هاتنە گەنگەشەكرن.
د ڤێ هەیڤێدا شاندەكێ دەولەتا قەتەر بۆ دروستكرنا پرۆژێن وەبەرهێنانێ دێ سەرەدانا زاخۆ كەن».
جگەرخوین تاهر عەبدی، رێڤەبەرێ گشتیێ وەبەرهێنانێ ل ئیدارا سەربەخۆیا زاخۆ راگەهاند، قەتەر دێ پرۆژێن وەبەرهێنانێ ل ئیدارا سەربەخۆیا زاخۆ ئەنجام دەت و ل بەرە د ڤێ هەیڤێدا شاندەكێ دەولەتا قەتەر سەرەدانا ئیدارا سەربەخۆیا زاخۆ بكەت بۆ دروستكرنا پرۆژان، ژ وان ژی پرۆژێن گەلیێ زاخۆ و پرۆژەیێ یاریا و پرۆژە بەنداڤا زاخۆ و كومەلگەهەكا گەشتیاری یا نموونەیی ل دەڤەرا زاخۆ و دروستكرنا كارگەهەكا وەرگرتنا فیقی «.
ئاشكرا كر، كو دەولەتا قەتەر دێ وەبەرهێنانێ د كەرتێ چاندنێ ل زاخۆ كەت و هژمارەكا پرۆژێن گرنگ یێن وەبەرهێنانێ ژلایێ دەولەتا قەتەر دێ ل زاخۆ هێنە بجهئینان، ئەڤ پرۆژە دێ بنە ئەگەر كۆ دەلیڤێن كاركرنێ ل دەڤەرا زاخۆ گەلەك زێدەبن».
