دەستهەلات و ئالیێ کوردی دو خواندنێن جودا بۆ پرۆژە یاسایا ئاشتیێ دکەن
بەرپرسێن دەم پارتی پرۆژە یاسایا ئاشتیێ وەکو پێنگاڤا ئێکێ بۆ چارەسەرکرنا پرسا کوردی دبینن و ل ئالیێ دی بەرپرسێن دەولەتا تورکیا ژی دبێژن دێ بیتە ئەگەرێ ژناڤچوونا تیرۆرێ و د پرۆژە یاسایێ دا بەحسێ کوردان نەهاتیە کرن.
سەزایی تەمەللی ئەندامێ پەرلەمانێ تورکیا سەر ب فراکسیۆنا دەم پارتی دیار کر، پرۆژە یاسایا ئاشتیێ دێ هێتە پەرلەمانی و دێ دەنگ ل سەر هێتە دان، ئەو یەک دەستپێکەکا گەلەک گرنگە و دێ بیتە ئەگەرێ چارەسەرکرنا پرسا کوردی و ئێدی سەردەمێ زۆرداریا ل سەر کوردان ل تورکیا ب دووماهی هات و کورد دشێن ب رێیا خەباتا سیاسی و مەدەنی بگەهنە گەلەک مافێن خوە و گۆت: (دەولەتا تورکیا نەشێت ئێدی ب بەهانەیا تیرۆرێ و جوداخوازیێ ئاستەنگان ل هەمبەر خەباتا سیاسی یا کوردان ل تورکیا دروست بکەت و هەروەسا دێ یاسایێن دی ژی دەرکەڤن و نها دهێتە چاڤەرێکرن کو نێزیکی سێ هزار گرتیێن سیاسی یێن کورد ژی بهێنە ئازاد کرن و ئەو یەک بێگومان گەلەک یا گرنگە).
ناڤهاتی ئەو یەک ژی دیار کر، نها ژی خەباتا سیاسی یا کوردان ل تورکیا بهێزە، لێ مخابن دەستهەلاتا تورکیا هەردەم ب بەهانەیا تیرۆرێ ئاستەنگی دروست دکرن و نها ب دەرئێخستنا یاسایا ئاشتیێ ئێدی کەس نەشێت کوردان ب تیرۆری و پارچەکرنا تورکیا تاوانبار بکەت و کورد ژی وەکو تورکان دێ گەهنە هەموو مافێن خوە، ئەو یەک ژی بێگومان دەستپێکا قووناغەکا نوو یە بۆ هندێ کو کورد ژی ل تورکیا بگەهنە مافێن خوە.
ل ئالیێ دی هاکان فیدان وەزیرێ دەرڤە یێ تورکیا ژی بۆ دەزگەهێن راگەهاندنا تورکیا دیار کر، پشتی کو دەزگەهێ هەوالگریا نشتیمانی و وەزارەتا بەرگریێ راپۆرتێن خوە رادەستی سەرۆک کۆماری بکەن و تێدا ئاماژە ب ڤێ یەکێ بهێتە کرن کو ئەندامێن پەکەکێ چەکێن خوە رادەست کرینە وی دەمی دێ شێن مفایێ ژ یاسایێ ببینن، لێ ئەندامێن کو چەکێن خوە رادەست نەکەن نەشێن مفادار بن و ئالیێن پەیوەندیار دێ یا پێدڤی بۆ قووناغا تورکیا بێ تیرۆر کەن.
سەبارەت ب یاسایێ نومان کورتولمیش سەرۆکێ پەرلەمانێ تورکیا ژی دیار کر، مە دڤێت شەڕێ ٥٠ سالان ل تورکیا ب دووماهی بهێت و تورکیا ژ بەلایا تیرۆرێ قورتال بیت، ژ بەر ڤێ یەکێ ژی پرۆژە یاسا گەلەک یا گرنگە و جهێ دلخوەشیێ یە کو پرانیا فراکسیۆنێن پەرلەمانێ تورکیا ژی یاسایا ئیمزا کرینە و دێ د نێزیکترین دەم دا ب کریاری گەلەک تشت هێنە کرن.
چاڤدێرێن سیاسی ژی دیار دکەن نها دو خواندنێن جودا بۆ پرۆژە یاسایێ دهێنە کرن، هەرچەندە دەم پارتی وەکو دەستپێکەکا نوو بۆ چارەسەرکرنا پرسا کوردی ل تورکیا دبینیت، لێ د پرۆژە یاسایێ دا بەحسێ چارەسەرکرنا پرسا کوردی نەهاتیە کرن و دیار نینە کا دێ پاشی یاسایەک نوو دەرکەڤیت یان نە.
