«دەمێ دروینا هیڤیان، نامەیەكا ڤەكری بۆ باغەڤانێن پاشەڕۆژێ»
سەروان نهێلی
ئەڤە پەیامەك بۆ دایك و بابێن هێژایە، خۆدانێن دلێن پڕ ژ ڤیانێ.. ئەڤرۆ وەرزێ دروینا وێ چاندنێ یە، یا كو هوون ب سالانە ب ڕۆناهیا چاڤێن خوە ئاڤددەن. ئەزموون نە بتنێ تاقیكرنا زارۆكانە، بەلكو تاقیكرنا دلۆڤانیا هەوە و ئارامیا ماڵێن هەوەیە. دا كو ئەڤ كاروانە ب سەلامەتی بگەهیتە گوپیتكێ، بلا ئەڤ پەیڤە ببنە چرایێ ڕێكا هەوە:
1- ئاڤاكرنا هێلینەكا ئارام: مالێ بكەنە پەناگەهەكا بێدەنگ. ئامیرێن تەكنۆلۆژیایێ
و مۆبایلان ل دەمێ خواندنێ ل ڕەخەكێ بدانن و سەرەدانێن خزم و كەسان كێم
بكەن، دا كو تەركیزا قوتابیێن هەوە بتنێ ل سەر پەیڤ و ڕۆپەلێن پەڕتووكێ بیت.
2- ریتما ژیانێ و خەوێ: خەو، كلیلا بیردانكێ یە. ڕێكێ بدەن زارۆكێن وە شەڤێ زووی بنڤن دا كو سپێدەهیێ وەك ڕۆژێ ب گەشاتی و ب هێز بەر ب هۆڵێن ئەزموونێ گاڤان باڤێژن.
3- خوارن، سۆتەمەنیا مێشكی یە: چ جاران رێكێ نەدەن زارۆك ب زكەكێ برسی بچیتە ئەزموونێ. تێشتەكا سپێدەهیێ یا تژی وزە، هێزێ ددەتە هزر و بیردانكا وان و وان ژ ماندیبوونێ دپارێزیت.
4- زمانێ ئەڤینێ و هاندانێ: ئەگەر ل بابەتەكی باش بەرسڤ نەدا، ببنە پشتەڤان نەك ئاستەنگ. ب زمانەكێ نەرم و ب بێهنفەرهی ئامۆژگاریا وان بكەن. توورەبوون ترسێ چێدكەت، لێ هاندان باوەریێ ددەتێ دا كو د ئەزموونێن داهاتی دا قەربوویێ بكەن.
5- ئامادەكاریێن پێشوەخت: بەری نڤستنێ، پشتراست بن كو هەمی پێدڤیێن وان (پێنڤیس، ژێبرك، كوژك…) ئامادەنە. ئەڤ چەندە باوەریەكا مەزن ددەتە قوتابی و وی ژ دوودلیێ دپارێزیت.
6- هونەرێ بەرسڤدانێ: وان فێر بكەن كو د هۆلا ئەزموونێ دا خۆدان بێهنەكا درێژ بن؛ بلا هەمی پرسیاران ب هویری بخوینن و ب ئاڕامی بەرسڤێ بدەن و چ پرسیاران بێ بەرسڤ نەهێلن.
7- زڤرین بۆ هەمبێزا مالێ: داخوازێ ژێ بكەن پشتی ئەزموون تمام دبیت، ئێكسەر
بزڤرنە ماڵێ. ماڵ باشترین جهە بۆ بێهنڤەدانێ و خوە بەرهەڤكرن بۆ رۆژا پاشتر.
8- نەخشەكێ ژیرانە: هاریكاریا وان بكەن خشتەیەكێ خواندنێ یێ رێكخستی هەبیت، كو د ناڤبەرا هەر وانەیەكێ دا، دەمەكێ كێم یێ بێهنڤەدانێ هەبیت دا كو مەژیێ وان دوبارە نوی ببیتەڤە.
هوون چاندنێ دكەن، و زارۆكێن مە دێ بەرهەمێ وێ چنن.. ب هیڤیا سەركەفتنێ بۆ هەمی چرایێن پاشەڕۆژێ!
