د جەژنێ دا پتری ٤٥ ھزار گەشتیاران قەستا دەڤەرا ئامێدیێ کریە
ئەڤرۆ نیوز، مەحمود نھێلی:
بەرپرسێ نڤیسینگەھا گەشت و گۆزارێ ل سیلاڤێ بو ئەڤرۆ نیوز دیار کر کو ئەڤ سالە رێژەکا زۆرا گەشتیاران قەستا ھاڤینگەھێن سنوورێ قەزا ئامێدیێ کریە و دبێژیت: ب تنێ د رۆژێن بھێنڤەدانا جەژنا رەمەزانێ دا دۆرێن ٤٥ ھزار گەشتیاران قەستا دەڤەرێ کریە و ل دەڤەرێ ڤەماینە ژ بلی وان گەشتیاران یێن د شەڤێ دا ڤەگەڕیاینە سەنتەرێ پارێزگەھا دھۆکێ.
حەمید محەمەد سالح، بەرپرسێ نڤیسینگەھا گەشت و گۆزارێ ل سیلاڤێ خویا ژی کر، پڕانیا وان گەشتیارێن قەستا ھاڤینگەھێن سنوورێ قەزا ئامێدیێ کرین، خەلکێ باشوور و ناڤەراستا عیراقێ نە، ھەروەسا ھژمارەکا زۆرا گەشتیاران ژی خەلکێ باژاڕێن دی یێن ھەرێمێ نە، وەکو ھەولێر، کەرکووک و سلێمانیێ.
ناڤھاتی ئاشکرا ژی کر، نوکە وان ئاریشا مانا گەشتیاران ل دەڤەرێ نەمایە و ھژمارەکا ئۆتێل و مۆتێلان ل دەڤەرێ ھاتینە چێکرن وگۆت: “د شیان دا ھەیە ھژمارەکا گەشتیاران لێ بھێنە ڤەحەواندن، لێ نوکە ئاریشا سەرەکی یا کەرتێ گەشت و گۆزاری ل دەڤەرێ نەبوونا رێیان و کارەب و ئاڤێ یە، پڕانیا جاددێن دچنە سەیرانگەە و ھاڤینگەە و جھێن گەشتیاری ل دەڤەرێ یێن خراب بووین و ژ کار کەفتین.
