رۆژنامەیەکا عه‌ره‌بی: تورکیا بەرهەڤە هێزێن خوە ژ ئاخا سووریێ ڤەکێشیت
ب، سه‌رجان مەحمود:
رۆژنامەکا لوبنانی دیار دکەت بەرپرسێن تورکیا ب رێیا رۆسیا و ئیرانێ پەیامەکا نوی بۆ شامێ هنارتینە و تێدا دیار کرینە ئەو نها ڤەکێشانا هێزێن خۆ ژ ئاخا سووریێ گەنگەشە دکەن، تنێ وان دڤێت بەشار یێ رازی بیت ل گەل ئەردۆغانی کۆمبیت، لێ هەتا نها ئەو یەک ژ ئالیێ بەشار ئەسەدێ سەرۆکێ رژێما سووریێ ڤە نەهاتیە قەبوول کرن.
پشتی 12 سالان تورکیا دخوازیت جاره‌کا دی پەیوەندیێن خۆ ل گەل سووریێ باش بکەت، ژ بۆ ڤێ یه‌کێ ژ ئیران و رۆسیا دخوازیت رژێما ئه‌سەدی رازی بکه‌ن دا کو د ئاسته‌کی بلند دا ده‌ست ب هه‌ڤدیتنان بکه‌ن، لێ هه‌تا نها ئه‌سەد رازی نه‌بوویه بێی مەرج ل گەل تورکیا دەست ب هەڤدیتنان بکەت و ل سه‌ر مه‌رجێ ڤه‌کێشانا هێزێن تورکیا ژ باکورێ سووریێ رژده.
ل ئالیێ دی دەزگەهێن راگەهاندنا رۆسیا ژی دیار کرن د هەڤدیتنا هەری دووماهیێ یا د ناڤبەرا پۆتین و بەشاری دا سەرۆکێ رۆسیا داخواز ژێ کریە، کو ل گەل رەجەب تەیب ئەردۆغانێ سەرۆکێ تورکیا دەست ب قۆناغەکا نوی بکەت، لێ ئه‌سەد رازی نه‌بوویه و ئاشکرا کریه، کو دڤێت تورکیا بێی مه‌رج هێزێن خوه ژ ئاخا وان ڤه‌کێشیت، هەروەسا بەشاری داخواز ژی کریە دڤێت تورکیا ب فەرمی دەست ژ پشتەڤانیا گرۆپێن تیرۆرستی ل سووریێ بەردەت، هەتا تورکیا داخوازیێن سووریێ بجه نەئینیت ئەو نەشێن ل گەل تورکیا دەست ب چو دانوستاندنان بکەن، چونکی ئەو یەک دهێتە رامانا شکەستنەکا مەزن بۆ سووریێ، شام ژی تشتەک وەسا قەبوول ناکەت.
د ڤێ مژارێ دا رۆژناما ئه‌خبار یا لوبنانێ ژی راگه‌هاند، کو ئه‌ردۆغان د ڤان رۆژێن بۆری دا جاره‌کا دی ژ پۆتین و بەرپرسێن ئیرانێ خوا‌ستیه فشارێن خۆ ل سەر بەشاری زێدەتر لێ بکەن، دا سەرۆکێ رژێما سووریێ رازی بیت ل گەل وی دەست ب قۆناغەکا نوی بکەت.
ل گۆر راپۆرتا رۆژناما لوبنانی بەرپرسێن تورکیا ئەو یەک ژی ئاشکرا کرینە، کو ئه‌و د ناڤ خوه دا مژارا ڤه‌کێشانا ژ باکورێ سووریێ گه‌نگه‌شه دکه‌ن و د ڤێ مژارێ دا جدی نه. بەرپرسێن تورکیا ژ بۆ ئیران و رۆسیا راگه‌هاندینه ئه‌و بەرهەڤن رێککەفتنەکا نوی ل گەل سووریێ بکەن و هەموو خالێن رێککەفتنێ ژی بجه بینن، لێ تنێ وان دڤێت سەرۆکێ سووریێ رازی بیت ل گەل ئەردۆغانی کۆمبیت. بۆ ڤێ چه‌ندێ نها رۆسیا و ئیران هه‌ول دده‌ن به‌ری هه‌لبژارتنێن تورکیا ژڤانەکێ بۆ هه‌ڤدیتنا ئەردۆغانی و ئەسەدی دیار بکەن، لێ هەتا نها ئەو یەک ژ ئالیێ بەشاری ڤە نەهاتیە قەبوول کرن، چونکی بەشار ئەسەد بەرهەڤ نینە بەری هەلبژارتنێن تورکیا ل گەل ئەردۆغانی کۆمبیت.
