سفرێن ل سەر دینارا ئیراقی دێ هێن ژێبرن
هەولێر، قائید میرۆ
حوكمەتا ئیراقی بڕیار دایە سفرێن سەر دینارێ ئیراقی بهێنە ژێبرن و دراڤێ ئیراقی وەك چاپا بەرێ یا سویسری بیت. ئەندامەكێ لیژنا ئابووری ژی ل پەرلەمانێ ئیراقی دبێژیت: ژێبرنا سفرێن ل سەر دینارا ئیراقی ئێكە ژ وان پێنگاڤێن باش، بەلێ كارەكێ ب زەحمەتە و چەندین سال پێدڤی نە هەتا هەموو پارە ل بازاڕی دهێتە ڤەكێشان و پارێ نوو بهێتە چاپ كرن. ژلایێ خۆڤە ژی شارەزایەكێ ئابووری ئاماژەكر، راكرنا سفرێن سەر دینارا ئیراقی ب تنێ گرێدایی دەروونێ وەلاتیێن ئیراقی ڤەیە و چو كاریگەریێن وەسا نابن.
سیپان شێروانی، ئەندامی لیژنا ئابووری ل پەرلەمانێ ئیراقی ل دۆر لابرنا سفرێن سەر دینارا ئیراقی بۆ رۆژناما ئەڤرۆ گۆت «ئەو پێشنیار د دەمێ دەست بكاربوونا سەرۆكێ بەنكا ناڤەندیا ئیراقی من پێشنیار كربوو، چونكە ئەگەر سێ سفرێن سەر دینارا ئیراقی بهێنە ژێبرن، ئەڤە پێنگاڤەكا باشە و دێ سەنگا بەرێ بۆ دینارا ئیراقی ڤەگریت، دراڤێ نوكە یێ ئیراقی ژلایێ ئابوری ڤە كاریگەری پەیداكرینە و بۆ ڤەگوهاستنێ ژی یێ ب زەحمەتە، زۆر چارەسەرێن دی ژی هەنە، بۆ نموونە چاپكرنا دراڤێ سەد هزاری، بەلێ هەموو چارەسەر دەمكی نە و چارەسەرا دوم درێژ ئەڤە ب تنێ سێ سفر بهێنە ژێبرن و نەمینن.
زێدەتر گۆتت: هێشتا رەوشا دراڤی ل ئیراقی باشترە نەك ل هەرێما كوردستانێ، چونكە هندەك مامەلەیێن كڕین و فرۆتنا ترۆمبێلا و ئەرد و خانیان ل پارێزگەهێن ئیراقی ب دینارا ئیراقی یە، بەرۆڤاژی ل هەرێما كوردستانێ زۆربەیا مامەلەیێن دهێنەكرن ب دۆلارێ ئەمریكیە، ژێبرنا سفرێن سەر دینارا ئیراقی پێدڤی ب بڕیارەكا گشتی هەیە، چونكە د دەمێ بجهئینانا بڕیارەكا ب ڤی شێوەی پێدڤیە پارەیێ نوكە ل بازاڕی و د دەستێ وەلاتیاندا هەموو بهێتە ڤەكێشان و دراڤێ نوو بكەڤیتە بازاڕی، ب دیتنا پرۆسەكا دومدرێژە و چەند سالان دێ ڤەكێشیت، بەلێ ددەمێ بجهئینانێ ژی دێ كاریگەریێن خوە ل سەر بازاڕی و ڤەگوهاستنا پارەی هەبن، ژبەركو ئەگەر سفر بهێنە لادان دێ گۆهۆڕینا دینارا ئیراقی زۆر ئاساناهیتر بیت.
جەگەر محەمەد، شارەزایێ ئابووری بۆ رۆژمانا ئەڤرۆ دیار كر «راكرنا سفران چ ژ بهایێ دینارێ ئیراقی هەمبەر دۆلاری ناگۆهۆڕیت، ب تنێ دێ كریارا ژمێریاریێ ب ساناهی كەڤیت و ژلایێ سایكۆلوژی ڤە باوەریا وەلاتیان ب دیناری ئینیت، وەزارەتا پلاندانا ئیراقی پێشنیاركریە، هەتا دینار ڤەگەڕیتە بانكێن ئیراقی، سفرێن سەر دینارا ئیراقی بهێنە لابرن، ئەڤە ژی زێدەتر بۆ سیولەیا نەختینەیە، چونكە دەمێ گۆهۆڕینا دینارێ نوكە بۆ دینارێ بێ سفر ب كارتا بانكی بیت، واتە بچیتە سەر هژمارا وەلاتیان، وی دەمی دێ ئێك دینار هێتە یەكسانكرن ب هزار دیناران. ب دیتنا من ئەز باوەرناكەم لابرنا سفران چو كاریگەریێن وەسا هەبن و بهایێ دیناری بلند بكەت هەمبەر دۆلاری، چو كارتێكرنەكا راستی ل ئابوری ناكەت، تنێ بابەتەكێ دەروونیە و وەسا هەست پێ دكەن دینار یێ بهێز بوو هەمبەر دۆلاری، زۆر جاران ژی ئەو كارە هاتیە كرن بۆ ئاسانكاریێن چالاكیا هژمارتنێ بەری نوكە ل توركیا و ئیرانێ و چەند وەلاتەكێن دی هاتیە ئەنجامدان.
