سلێمان رەمەزان: دەربازبوون بۆ قۆناغا 16ێ ب كارەكێ كۆم هاتە كرن
ئەڤرۆ
تیما تەپا پێی یا یانەیا دهۆك دەربازبوو قۆناغا 16ێ ژ قارەمانیا كۆپا ئیراقێ پشتی ب سەركەفتی ل سەر خودانێن ئەردی یانەیا ئەلقاسم ب لێدانێن پەنەلتیا 9-8 پشتی یاری ب گۆلەكێ بۆ هەردو تیمان وەكهەڤی ب دووماهی هاتی د یاریا واندا ئەوا ل شەڤا شەمبیا بۆری ژ چارچووڤێ قۆناغا 32ێ یاریا پاشئێخستی ل یاریگەها كەربەلا هاتیە كرن.
بڤێ چەندێ تیما دهۆكێ هژمارا یانەیێن دەربازبوویێ ب 16 تیمان ئێكلاكر پشتی هەر ئێك ژ یانەیێن هەولێر، جەویە، تەلەبە، شورتە، زەورا، كەرخ، نەفت ئەلوەسەت، بەحری، شرگات، حدوود، نەفت میسان، كەربەلا، مەسافی، نەفت بەلبەسرا و ئەمانەت بەغدا و بریارە سوبەهی پشككێشانی بهێتە كرن.
د داخویانیەكێ دا سلێمان رەمەزان راهێنەرێ تیما دهۆكێ بۆ رۆژناما ئەڤرۆ گۆت: دەربازبوون بۆ قۆناغا16ێ ب سانەهی نەبوو ژبەركو نێزكی نەه یاریزانێن مە د هنگاڤتی و بەرهەڤ نەبوون، دیسان تیما ئەلقاسم بزاخا سەركەفتنا بۆری دگەل جەویە هاتبوونە دناڤ یاریگەهێ دا، لێ مە خوە بێ ئۆمێد نەكر و ب كارێ كۆم دگەل هەموو یاریزان و كارگێریا یانێ پێخەمەت بشێن ئەنجامی ب دەستخوەڤەبینن، پێخوەشحالین شیاین ب گەهینە ئارمانجا خوە و سەركەفتنێ تۆماربكەین، ئەم د دوچەپەران شەڕی دكەین ب هەموو شیانێن خوە دێ بزاڤێن سەركەفتنێ د خول و كۆپا ئیراقێ دا بەردەوامبین، ئەركێ مە ب زەحمەتە لێ پشتەڤانیا كارگێریێ و جەماوەری و زاخا یاریزانان گەشبینن بۆ بەردەوامیا سەركەفتنان.
بۆ زانین باشترین ئەنجامێ تیما دهۆكێ د كۆپا ئیراقێ دا ئەوا ل وەرزێ 2015-2016 بوو، د قۆناغا پێش دووماهیێ دا دهۆكێ دو یاری دگەل یانەیا جەویە یا بەغدایی كرن، د یاریا ئێكێ دا ئەوا ل یاریگەها دهۆكێ هاتیە كرن ئەلهۆیێن چیا شیابوو ب چار گۆلان بەرانبەر گۆلەكێ سەركەفتنێ ل سەر جەویە بینن، لێ د یاریا دویێ دا ب سیناریۆیا ترسێ و گەڤان یانەیا جەویە شیا ب سێ گۆلان بێ بەرامبەر سەركەفتنێ بینت و دەربازبیتە یاریا دووماهیێ.