سه‌رباری به‌رهه‌ڤیێن كوردستانێ مۆندیالا كۆنیفایێ هاته پاشئێخستن
ب فه‌رمی فیدراسیۆنا فوتبۆلا هه‌رێمان ل جیهانێ ژڤانێ هه‌ڤڕكیێن مۆندیالا كۆنیفا 2024ێ بۆ هاڤینا سالا 2025ێ پاشئێخست، پشتی خوه‌ڤه‌كێشانا هژماره‌كا مه‌زن ژ هه‌لبژارتیێن پشكدار د قاره‌مانیێ دا، سه‌رباری به‌رهه‌ڤیێن هه‌رێما كوردستانێ بۆ مێڤانداریكرنا وێ ئه‌وا بڕیاربوو ل 26ێ خزیرانا ئه‌ڤ ساله ب پشكدارییا 14 هه‌لبژارتییا ل پێنج یاریگه‌هێن هه‌ریمێ هاتبا ئه‌نجامدان.
ل دۆر ڤێ یه‌كێ ئازاد محه‌مه‌د ئه‌ندامێ فیدراسیۆنا فوتبۆلا كوردستانێ بۆ رۆژنامه‌یا ئه‌ڤرۆ گۆت: وه‌كو هه‌رێما كوردستانێ بۆ ڤێ قاره‌مانیێ هه‌ر تشته‌كێ پێدڤی پێخه‌مه‌ت بڕێڤه‌چوونه‌كا سه‌ركه‌فتی هاتبوو كرین كو راسته‌وخوه ب پشته‌ڤانییا مه‌سرۆر بارزانی سه‌رۆكێ حوكه‌تا هه‌رێما كوردستانێ و چه‌ندین ئۆتێل و یاریگه‌هـ و جهێن پێدڤی هاتبوونه ده‌ستنیشانكرن و به‌رهه‌ڤكرن بۆ قاره‌مانیێ هه‌روه‌سان سلێمان ره‌مه‌زان وه‌كو راهێنه‌رێ هه‌لبژارتیێ كوردستانێ ژی هاتبوو ده‌ستنیشانكرن پێخه‌مه‌ت مێهڤانداری و پشكداریه‌كا سه‌ركه‌فتی بیت، لێ ژ نشكه‌كێ ڤه ژ سه‌رجه‌مێ 16 هه‌لبژارتییان بتنێ شه‌ش هه‌لبژارتیێن هه‌رێمان به‌رهه‌ڤبوون پشكداربن، یێن دی بڕێیا فیدراسیۆنا كۆنیفایێ داخواز كربوو قاره‌مانی بهێته پاشئێخستن، سه‌رباری مه هه‌موو خالێن سه‌ركه‌فتنێ و پێشوازیكرنێ بۆ به‌رهه‌ڤكربوون.
ناڤهاتی ئه‌گه‌رێن خوه‌ڤه‌كێشانا وان بڤی شێوه‌یی دیاركر و گۆت: ئه‌گه‌رێ سه‌ره‌كی یێ كو بخوه كرینه بوهانه هنده هه‌لبژارتی داخوازا پاشئێخستنا قاره‌مانیێ بكه‌ن ژبه‌ر كاودانێن ئه‌منی یێن خراب ل رۆژهه‌لاتا ناڤه‌راست تایبه‌ت دناڤبه‌را وه‌لاتێن ئیسرائیل و ئیرانێ دا، له‌وما د دووماهی كۆمبوونا خوه یا فیدراسیۆنا كۆنیفایێ پشتی چه‌ندین گه‌نگه‌شه هاتینه كرن و ژبه‌ركو رێژه‌كا مه‌زن یا هه‌لبژارتیان داخوازا پاشئێخستنێ كربوو له‌وما ب فه‌رمی بۆ هاڤینا سالا 2025ێ قاره‌مانی هاته پاشئێخستن.
