سیاسەتا خراب یا ترامپی زیانێن مەزن گەهاندینە گەلێ ئیرانێ
چاڤدێرێن سیاسی دیار دکەن ژ بەر سیاسەتا خراب یا ترامپی ل هەمبەر دەستهەلاتا نها یا ئیرانێ بێ باوەری د ناڤ خەلکی دا دروست بوویە، چونکی بەری نها خەلکی وەسا هزر دکرن دشێن ب خوەنیشادانان دەستهەلاتا ئیرانێ بگوهۆڕن.
د. هێمن سەیدی بسپۆرێ کاروبارێن سیاسی دیار کر، بەری شەڕێ ئیرانێ ل گەل ئەمریکا و ئسرائیلێ خوەنیشادانێن مەزن ل ئیرانێ ل دژی دەستهەلاتێ هەبوون، وی دەمی د ناڤ خەلکی دا باوەریەک وەسا هەبوو ئەو دشێن ب خوەنیشادانێن جەماوەری رژێما ئیرانێ ژناڤ ببەن، لێ ترامپی سیاسەتەک گەلەک شاش ل هەمبەر دەستهەلاتا ئیرانێ برێڤە بر و گۆت: (د دەمەکێ دا کو دەستهەلاتا ئیرانێ گەلەک لاواز ببوو ترامپی شەڕ دا راگرتن و هەروەسا هەلوەستێ وی یێ ئالۆز ژی وەسا کر کو باوەریا خەلکێ ئیرانێ ب سیاسەتا ترامپی نەهێت، مخابن نها خەلک ل ئیرانێ وەسا هزر دکەن کو دەستهەلات گەلەک بهێزە و ژناڤ ناچیت، ئەگەرێ سەرەکی ژی بێگومان شاشیێن ترامپی بوون).
مەیسەم مورادی چاڤدێرێ سیاسی یێ خەلکێ رۆژهەلاتێ کوردستانێ ژی دیار کر، راستە ژ بەر سیاسەتا نەدیار و ئالۆز یا ترامپی خەلکێ ئیرانێ نزانن کا دێ پاشەرۆژا وان چاوا بیت، د هەمان دەمی دا هێشتا دیار نینە کا دێ ئەنجامێ دانوستاندنان چ بیت، ژ بەر کو ئسرائیل و وەلاتێن عەرەبی ل دژی رێککەفتنێ نە، ئەو دزانن هەکە رێککەفتنەکا وەسا ل گەل ئیرانێ بهێتە کرن ئەو یەک دێ بیتە ئەگەرێ بهێزبوونا رژێما نها یا ئیرانێ و گۆت: (گەلەک هێز ل دژی رێککەفتنێ نە، ترامپ ژی گەلەک تەنگاڤ بوویە، لێ د هەمان دەمی دا بەرپرسێن ئیرانێ ژی رێککەفتنێ وەکو سەرکەفتنەکا مەزن بۆ خوە ل قەلەم ددەن و ئەو یەک ژی بێگومان ئاریشەیەکا مەزنە، هێشتا دیار نینە کا دێ ترامپ پشتی دو مەهان چ کەت).
ل ئالیێ دی هژمارەک زێدە ژ چاڤدێرێن سیاسی ژی وەسا دبینن هەکە نها رێککەفتنەکا وەسا بهێتە کرن و ئیران بشێت چەند ملیار دۆلاران ژ پارەیێن خوە وەربگریت ئەو یەک سەرکەفتنەکا گەلەک مەزنە بۆ دەستهەلاتا ئیرانێ، د دەمەکێ وەسا دا ئیران دێ بیتە هێزا هەری مەزن و کاریگەر ل رۆژهەلاتا ناڤین و دێ بەردەوام ژی ئاریشەیان بۆ ئسرائیلێ و هەڤپەیمانێن ئەمریکا دروست کەت، ژ بەر ڤێ یەکێ ژی ئسرائیل ب چو رەنگەکێ رێ نادەت ترامپ رێککەفتنەکا وەسا ل گەل ئیرانێ ئیمزا بکەت، ئانکۆ رەوشا نها گەلەک ئالۆزە و جارێ گەلەک زەحمەتە پێشبینا ڤێ یەکێ بهێتە کرن کا دێ رێککەفتن هێتە کرن یان دێ شەڕەکێ نوو روو دەت، چونکی هەلوەستێ ئالۆز و داخویانیێن جودا جودا یێن ترامپی وەسا کرینە کو هەڤپەیمانێن ئەمریکا ژی نها ژ سیاسەتا وی وەلاتی گەلەک توورە نە.
