شیمال محەمەد: دێ هەموو بزاڤان كەین بێ ناسناڤ ژ هندستانێ ڤەنەگەڕین
د داخویانیەكێ دا ڕاهێنەرێ یانەیا دهۆك و هەلبژارتیێ ئیراقێ بۆ یارییا تیكۆنجتسۆ والسكی دیاركر كو د نوكە دا ئەو یێن پشكدارن د قارەمانییا نێڤدەولەتی یا ڤەكری بۆ یاریزانێن ماستەرێ ل سەر ئاستێ هەلبژارتییان ئەوا هەڤڕكیێن وێ ل باژێرێ جاهام یێ وەلاتێ هندستانێ هێنە كرن و دێ بەردەوامبیت هەتا 12ێ ڤێ مەهێ، هەلبژارتیێ ئیراقێ دڤێ قارەمانیێ دا ل سەر ئاستێ كوڕان و كچان پشكدارە ژ وانا پێنج یاریزان و ڕاهێنەرێ كوڕ یێن پارێزگەها دهۆكێ.
زێدەتر شیمال محەمەد سالح بۆ رۆژنامەیا ئەڤرۆ گۆت: هەلبژارتیێ ئیراقێ بۆ یارییا والسكی ب نەهـ یاریزان و دو ڕاهێنەران كوڕ دگەل چار یاریزانێن كچ پشكدارن نێزیكی250 یاریزان ژ 18 وەلاتێن كێشوەرێ، ئاسیا، ئەفریقا و ئۆرۆپا پشكدارن كو دهێتە هژمارتن ئێك ژ ب هێزترین قارەمانیێن نێڤدەولەتی د چەرخێ نوو دا، ژبەر پشكدارییا قارەمانێن جیهانی.
ناڤهاتی ئەوچەندە ژی گۆت: پێنچ كەس ژ پارێزگەها دهۆكێ دگەل هەلبژارتیێ ئیراقێ پشكدارن ئەو ژی ئەم دو ڕاهێنەر دگەل محەمەد جەلال ڕاهێنەرێ یانەیا ئافرەتێن دهۆكێ و ئەز وەكو ڕاهێنەرێ یانەیا دهۆك دێ سەرپەرشتییا هەلبژارتیێ ئیراقێ دڤێ قارەمانیێ داكەین، نەهـ یاریزان هاتینە دەستنیشانكرن ژ وانا سێ یێن پارێزگەهێ هەنە ئەوژی سەلمان سابر، یاسر دەروێش و محەمەد غازی، ئەڤە ژی پێشهاتەكێ نوویە و بەلگەیە ل سەر پێشكەڤتنا ڤێ یاریێ ل پارێزگەهێ.
ژلایەكێ دووڤە شیمال محەمەد گۆت: دبیت ئەركێ مە ب سانەهی نابیت ژبەركو ئەو تیمێن پشكدارن پرانییا وان یاریزانێن خودان شیان هەنە، لێ مە ژی بەرهەڤیێن باش كرینە و باوەری ب شیانێن یاریزانێن خوە هەیە، ڕژدین ب دەستكەڤت ڤەگەرین و ئەڤە ئارمانجامەیە و دێ هەموو بزاڤان كەین بێ ناسناڤەك ژ هندستانێ نە ڤەگەڕین.
ل دووماهیێ ناڤهاتی گۆت:چارچووڤەیێ مانا مە ل هندستانێ دا دێ دادڤانێن مە پشكداریێ د خولەكا تایبەت یا ڤاڤارتن و پلەكرنا نێڤدەولەتی دا كەن كو مەرەم ژێ پێشئێخستنا ئاستێ دادڤانێن ئیراقێ و كوردستانێ یە، دووڤدا دێ لیستەیا دادڤانان بۆ قارەمانییا ئاسیا هێنە دانان ئەوا بڕیارە ل چریا ئێكێ یا ئەڤ سالە ل قیریغستانێ بهێتە كرن.
