شیمال محەمەد: سێ یاریزانێن پارێزگەهێ ب دەستكەڤت و بلندكرنا ئالایێ كوردستانێ ژ هندستانێ ڤەگەڕیان
د داخویانیەكێ دا شیمال محەمەد سالح ڕاهێنەرێ هەلبژارتیێ ئیراقێ و یانەیا دهۆكێ كەیفخوەشیا خوە دیاركر كو پشتی سێ یاریزانێن وان ڕێزێن ئێكێ بۆ كێشێن جودا ل سەر ئاستێ كوڕان بۆ قارەمانییا كۆپا ماستەر یا نێڤدەولەتی یا یارییا والسكی ب دەسڤە ئینا، د هەڤڕكیێن قارەمانیێ دا ئەوا بۆ ماوەیێ حەفتییەكێ ب پشكدارییا هەشت وەلاتێن جیهانێ ل باژێرێ سریناگال یا هندستانی هاتیە كرن.
زێدەتر ناڤهاتی گۆت: هەلبژارتیێ ئیراقێ نەهـ میدالیێن جورە و جور بدەستڤە ئیناینە، شەش زێر، دو زیڤ و ئێك برۆنزی ب دەستڤە ئینان ژ وانا سێ زێر ژلایێ یاریزانێن پارێزگەهێ بوون و بڤی شێوەیی، سیداد سەلمان سابر و محەمەد غازی ژ یانەیا شێخان، یاسر درویش ژ یانەیا دهۆك كو ئەڤ یاریزانە ب سەرپەرشتیا من بوو، هەروەسان ڕاهێنەرێ هەلبژارتیێ ئیراقێ یێ كچان كو ڕاهێنەرێ یانەیا ئافرەتێن دهۆكێ یە.
ژلایەكێ دووڤە ناڤهاتی: بۆ مە یا گرنتر ئەو بوو كو یاریزانێن مە ب ئالایێ كوردستانێ بلند كرین و ئەڤە ژی شانازییە بۆ مە كوردستانییان، هەروەسان مە بۆ هەموو پشكداران دیاركر كو ل كوردستانێ ژی وەرزشڤانێن خودان شیان هەنە، بەری پشكداریێ بكەین و مە د داخویانیەكێ دا بۆ هەوە دیاركربوو كو بێی دەستكەڤت نا ڤەگەڕین ، سۆپاس بۆ خودێ ئەم گەهشتینە ئارمانجا خوە و سێ میدالیین زێری یێن نێڤدەلەتی ب دەستڤە ئینان، ئەڤ ناسناڤە وەكر كو یاریزانێن مە بۆ قارەمانییا كۆپا ئاسیا ژی پشكداریێ بكەن ئەون ئەوا بڕیارە دێ ل چریا ئێكێ یا بهێت وەلاتێ قیرغستانی مێڤاندارییا وێ بكەت.
بۆ زانین یارییا والسكی ل سەر ئاستێ جیهانێ یا نوویە گرێدایی فدراسیۆنا تیكۆنجتسۆ والسكی یا نێڤدەولەتییە و25 فدراسیۆنێن وەلاتان هەنە، دڤێ قارەمانیێ دا هەر ئێك ژ هەلبژارتیێن هندستانی یا ئێكێ و یا دویێ، ئیراق، نیپال، بەنگلادش، سریلانكا پشكداربوون.
