شەڕێ مە ل گەل ئیرانێ ب دووماهی نەهاتیە
سەرۆک وەزیرێن ئسرائیلێ دوهی دیار کر، سەرۆکێ ئەمریکا باش تێگەهشتیە کو ئیرانێ نەڤێت چو رێککەفتنان بکەت، چەندین سالن بەرپرسێن ئیرانێ وەسا یاریێ ب جیهانێ دکەن و دخوازن دەمی ژ بۆ بەرژەوەندیێن خوە بکار بینن، ترامپ گەلەک بزاڤ کرن کو رێککەفتنەک باش ل گەل ئیرانێ بهێتە کرن کو بابەتێ بەرنامەیێ ئەتۆمی یێ ئیرانێ بهێتە چارەسەرکرن، لێ دیارە بەرپرسێن ئیرانێ دخوازن ل ژێر ناڤێ دانوستاندنان هندەک تشتێن دی بکەن و رەوشێ ئالۆزتر لێ بکەن.
نەتانیاهۆ ئەو یەک ژی دیار کر، شەڕێ ل گەل ئیرانێ ب دووماهی نەهاتیە و دڤێت بەری هەر تشتەکێ ئیران هەموو یۆرانیۆما پیتاندی رادەست بکەت و هەروەسا بەرنامەیێ موشەکی یێ ئیرانێ ژی دڤێت بهێتە چارەسەرکرن، ئانکۆ دڤێت ئیران ئێدی نەبیتە مەترسی بۆ ئەمریکا و ئسرائیلێ و وەلاتێن دی یێن دەڤەرێ، هەتا ئەو یەک نەهێتە کرن دێ شەڕێ ل دژی ئیرانێ بەردەوام بیت و ئەڤرۆکە پتر ژ هەر دەمەکێ وەلاتێن جیهانێ دزانن کا ئیران چەند یا مەترسیدارە.
