عەمەر عەبدولكەریم: پشتەڤانی ل دادڤانێن زاخۆ ناهێتە كرن
ئەڤرۆ
زاخۆ، عەلی حاجی:
عەمەر عەبدولكەریم دادڤانەكێ یاریا تەپاپێی یە ل باژێرێ زاخۆ بۆ رۆژناما ئەڤرۆ دیار كر مەزنترین كێماسی بوو كو باژێرێ زاخۆ بێ دادڤانان بوو، لێ پشتی هاتینە دروستكرن وەكو پێدڤی گرنگی پێ ناهێتە دان و هەتا نوكە ژی مە پێدڤیێن دادڤانان نینن.
زێدەتر ناڤهاتی گۆت: د سالێن بوری دا ژ روویێ وەرزشێ ڤە باژێرێ زاخۆ پێنگاڤێن باش هاڤێژتینە ژ روویێ دادڤانان ڤە كێماسی هەبون، لێ ئەم چەند كەسەك بوین وەكو ڤیان بۆ ناڤێ زاخۆ ئەو ئەركە مە راكر و نوكە دا سێ دادڤانێن فەرمی ل باژێرێ زاخۆ هەنە ژبۆ برێڤەبرنا یاریان د خولێن كوردستانێ دا، جهێ داخێ یە هەتا نوكە چو كەسەكێ پشتەڤانیا مە نەكری یە نە یا ماددی و نە مەعنەوی و هەتا نوكە ژی ب دروستی مە پێدڤیێن وەرزشی نینن و بەروڤاژی باژێرێن دیترێن كوردستانێ گرنگیەكا تایبەت ب دادڤانێن خوە ددەن هەر ژ دانانا خولێن ب هێزكرنا ئاستێ دادڤانان و گەلەك تشتێن، لێ ئەم وەكو دادڤانێن زاخۆ هەتا نوكە مە جلوبەرگێن وەكو ئێك نینن، هەكە پشتەڤانی ل مە بهێتە كرن بێگومان دێ شێن یاریان ب شێوەیەكێ باش برێڤە بەین.
ل دووماهیێ عەمەری گۆت: ڤەكرنا خولێن بهێزكرنا دادڤانان بۆ باژێرێ زاخۆ ب گرنگ دبینم ژبەر كو ژ هەر دەمەكێ پتر زاخۆ پێدڤی ب دادڤانان هەیە و سێ دادڤان بۆ باژێرەكێ وەكو زاخۆ كێمن و پێدڤیە كارەكێ ب رژدی بهێتە كرن ژ بۆ زێدەكرنا وان، زێدەباری هندێ ژی مە پێدڤییەكا مەزن ب سەرپەرشتەكێ هەیە كو چاڤدێریا مە بكەت دا كو بێ بار نەبین ژ مفایێن خوە .
6