فراكسیۆنا پارتی: كاراكرنا پەرلەمانی شەرعییەتا دەنگێ خەلكی و مانەڤەیا قەوارەیێ هەرێمێ یە
ب هەلكەفتا بۆرینا دوو سالان ل سەر هەلبژارتنا خولا شەشێ یا پەرلەمانێ كوردستانێ، فراكسیۆنا پارتی دیموكراتی كوردستان د پەرلەمانیدا، بەیاننامەیەك بەلاڤكر و بەرهەڤییا پارتی بۆ كاراكرنا پەرلەمانی ڕاگەهاند.
د بەیاننامەیێ دا فراكسیۆنا پارتی دبێژیت» دوو سال دەرباز دبن ب سەر ئەنجامدانا هەلبژارتنا خولا شەشێ یا پەرلەمانێ كوردستانێ. ئەو ڕۆژا وەلاتییێن هەرێما كوردستانێ ب ئاستەكێ بلند یێ پشكداریێ و ب بەرپرسیارەتی ڤە دەنگ دای و ئیرادەیا خوە بۆ پاراستن و پاشەڕۆژەكا گەش بۆ هەرێما كوردستانێ دەربڕی، لێ مخابن هەتا نوكە پەرلەمانێ كوردستانێ یێ كارا نینە و نەشیایە ب ئەركێن خوە یێن یاسایی یێن چاڤەڕێكری د سیستەمێ حوكمڕانییا هەرێما كوردستانێ دا ڕاببیت».
د درێژاهییا بەیاننامەیێ دا هاتییە « ئەم ل فراكسیۆنا پارتی دیموكراتی كوردستان، د دەمەكیدا دووپاتیێ ل سەر هەلوەستێ خوە یێ نەگوهۆڕ د ڕێزگرتن ل بنەمایێن دیموكراسیێ و كارابوونا دامودەزگەهێن هەرێما كوردستانێ دكەین، دووپات دكەین كو بەردەوام ئەم بەرهەڤ بووین بۆ كاراكرنا پەرلەمانی و گرێدانا كۆمبوونێن وی. هەردەم ژی خودان و پشتەڤانێن هەموو پێنگاڤ و دەستپێشخەرییەكێ بووین یێن كو بۆ ڤی مەرەمێ هاتینە پێشكێشكرن، لەوما داخواز ژ هەموو فراكسیۆنێن هێژا یێن پەرلەمانێ كوردستانێ دكەین، دا كو ب زووترین دەم پێكڤە ب ئەركێ خوە یێ دیرۆكی و یاسایی ڕاببین و پێنگاڤان باڤێژین بۆ تمامكرنا ڕێكار و ئەركێن ڕوونشتنا ئێكێ یا پەرلەمانی و هەلبژارتنا دەستەیا سەرۆكاتسیا وی، وەكو دەستپێكەكا گرنگ بۆ كاراكرنا پەرلەمانێ كوردستانێ، ژ پێخەمەت ڕێزگرتن و بدەنگڤەهاتنا داخوازییا هەموو تەخ و چینێن هەرێما كوردستانێ د لەزكرنا كاراكرنا پەرلەمانیدا».
فراكسیۆنا پارتی گۆت ژی «فراكسیۆنا مە، پێگیرییا خوە بەرامبەر دەنگدەرێن پارتی و جەماوەرێ كوردستانێ دووپات دكەت، و باوەرییا مە وەسا یە كو ئەركێ پاراستنا قەوارەیێ هەرێما كوردستانێ و بەرژەوەندییێن بلند، د ستۆیێ هەموو فراكسیۆن و ئەندامێن پەرلەمانیدایە. هەر ژ بەر ڤێ چەندێ ژی، كاراكرنا پەرلەمانی نابیت ب چ بەرژەوەندی و ململانێیەكا سیاسی و حزبی ڤە بهێتە گرێدان، چونكی ئەڤە شەرعییەتا دەنگێ خەلكی یە و شەرعییەتا مانەڤەیا قەوارەیێ هەرێما كوردستانێ یە.
فراكسیۆنا پارتی ل پەرلەمانێ كوردستانێ ڕۆهنكر ژی» هیڤیدارین ئەڤ ڕەوشا نەباش دەرباز ببیت و ب نێرینەكا هەڤپشك و بۆ پێشڤەبرنا بەرژەوەندییێن هەرێما كوردستانێ، ئەم هەموو پێكڤە ب كاراكرنا پەرلەمانی ڕێزێ ل ماف و ئیرادەیا خەلكێ كوردستانێ بگرین، و پێكڤە پێنگاڤان باڤێژین بۆ قووناغەكا نوو یا كارێ پەرلەمانی و بەر ب پێشڤەبرنا پرۆسەیا یاسایی و حوكمڕانییا هەرێما كوردستانێ ژ هەموو ئالییان ڤە».
