فراكسیۆنا پارتی پشتەڤانیا هەوا ئەلزەیدی دكەت و داخوازێ دكەت هەموو ئیراقێ ڤەگریت
فراكسیۆنا پارتی دیموكراتی كوردستان ل جڤاتا نوونەرێن ئیراقێ پشتەڤانییا خۆ یا تمام بۆ پێنگاڤێن یاسایی یێن عەلی فالح ئەلزەیدی، سەرۆك وەزیرێن ئیراقێ و دەستهەلاتا دادوەری بۆ رووبڕووبوونا گەندەلیێ و دەستەسەركرنا تومەتباران راگەهاند؛ هەروەسا داخواز كر كو پرۆسەیا چاكسازییا كارگێڕی بتنێ ل بەغدا نەمینیت و هەموو پارێزگەهێن دی ژی ڤەگریت.
فراكسیۆنا پارتی دیموكراتی كوردستان ل جڤاتا نوونەرێن ئیراقێ د بەیاننامەیەكێ دا رۆناهی ئێخستە سەر وێ هەوا كو ل ئیراقێ بۆ دەستەسەركرنا گەندەلكاران دەستپێكری.
فراكسیۆنا پارتی د ربەیاننامەیا خۆ دا ئاماژە ب وێ چەندێ كر كو پشتەڤانی و پێشوازیێ ل وان پێنگاڤێن یاسایی دكەن یێن ژ ئالیێ عەلی فالح ئەلزەیدی ڤە ب هاریكاری و پشتەڤانییا دەسهەلاتا دادوەری و دەزگەهێن حكومی ب ئاراستەیا رووبڕووبوونا گەندەلیێ و دەستەسەركرنا كەسێن تێكهەل بووین هاتینە هاڤێتن.
فراكسیۆنا پارتی هیڤی خواست ئەڤ پرۆسەیە بتنێ ل بەغدا نەبیت، بەلكو هەموو پارێزگەهـ و باژێڕێن دی یێن ئیراقێ ژی ڤەگریت؛ هەروەسا بۆ سەرئێخستنا ڤێ پرۆسەیێ دوپاتی ل سەر گرنگییا هەماهەنگییا تمام د ناڤبەرا دەستهەلاتا بجهئینانێ و دادوەریێ دا دكەت.
د پشكەكا دی یا بەیاننامەیێ دا هاتیە كو ژ روانگەها بەرپرسیارەتییا نەتەوەیی، بەرهەڤییا خۆ یا تمام بۆ پێشكێشكرنا هەر جورە هاریكاری و پشتەڤانییەكێ دیار دكەن، چ ل سەر ئاستێ حوكمەتا فیدرالی یان ل سەر ئاستێ ناڤخۆیی یێ پارێزگەهان، ژ پێخەمەت پشتەڤانیكردنا دەستهەلاتا بجهئینانێ و دادوەریێ بۆ دیتنا راستیبان و بنەجهكرنا سەروەرییا یاسایێ.
فراكسیۆنا پارتی دوپات دكەت كو وەلاتی هەژی چاكسازییا كارگێڕی و ڤەگەراندنا مافێن وان یێن ژ دەست چووینە، و ل سەر ڤێ بنەمایێ ژی دوپاتیێ ل سەر پشتەڤانییا تمام بۆ لێپرسینا یاسایی ل گەل هەر گەندەلكارەكی بێی جوداهی دكەن، دا كو ئێدی بوار بۆ دزینا مالێ گشتی نەمینیت.
