فلمێ (جیران) ل رۆژئاڤایێ كوردستانێ دێ هێتە نیشادان
زنار تۆڤی
فلمێ (جیران) یێ سینەمایی، كو ژ دەرهێنانا (مانۆ خەلیل) ە، دەست نیشادانێن خۆ ل باژێرێن كوردی یێن رۆژئاڤایێ كوردستانێ كر، ڤی فلمی پشتی پشكداری و سەركەفتنان ل چەندین فێستیڤال و چالاكیێن نێڤدەولەتی، نوكە دزڤڕیتەڤە بۆ لایێ بینەرێن كورد و ل گەلەك باژێر و دەڤەرێن كوردان دێ هێتە نیشادان.
دەرهێنەر (مانۆ خەلیل) گۆت: ئەڤ فلمە ل (قامیشلۆ، عاموودە، دێرك، رۆمێلان، توربەسپی، دربێسیێ) دێ هێتە نیشادان، چیرۆكا فلمی بەحسێ زارۆكەكێ كورد یێ شەش سالی دكەت، كو ل گوندەكێ نێزیكی سنوورێ باكور و رۆژئاڤایێ كوردستانێ ل قامیشلۆ دژیت، مالا وان دناڤبەرا دو دەولەتێن توركیا و سووریێ دا هاتیە دابەشكرن، ئەو فلمە بەحسێ 50 سالێن زۆرداریا رژێما بەعسا سووری دكەت، كو بۆ هەر كوردەكی ئەو فلمە یێ پرە ژ ئێش و بیرەوەریێن نەخۆش، كو زارۆكەكێ، ژ ئەگەرێ ئاخفتنا ب زمانێ كوردی ل قوتابخانێ قوتان دخوار، هەروەسا ل قوتابخانێ ب عەرەبی و ل مال ب كوردی د ئاخفت، ئەو سنوورێ كو ئەردێ كوردان، مال، فەرهەنگ و مرۆڤاتی دابەشكرین و ئەڤ سەركەفتنە بێی هاریكاری و وەستیانا تیما كاری سازیێن كولتووری و دلسۆزییا ئەو كەسێن باوەری ب گرنگییا سینەما و هونەریێ كوردی هەی، نە دهاتە هەبوونێ.
