فەهمی فازل: بۆ وەرزێ نوو دێ ب نڤشەكێ نوو هێینە د ناڤ هەڤڕكییان دا
د داخویانیەكێ دا پەیڤدارێ یانەیا بجیل یا وەرزشی ئاشكراكر دەستەیا كارگێریا یانەیێ ب هەموو شیانێن خۆ ڤە د بزاڤ دانە بۆ خۆ بەرهەڤكرنەكا تەمام یا تیما فوتبۆلێ بۆ وەرزێ نوو یێ خولا پلا دو یا كوردستانێ، ئەوا بڕیارە هەڤڕكیێن وێ دناڤبەرا تەباخێ و ئەیلوونا بهێت دەستپێبكەت.
زێدەتر فەهمی فازل بۆ رۆژناما ئەڤرۆ گۆت: پلان و ستراتیژیەتا مە یا ئەڤ سالە ئەوە كو ب رێژەیا ٨٠٪ پشت بەستنێ ل سەر یاریزانێن خۆجهی و خودان شیانێن دەڤەرێ بكەین كو ب نڤشەكێ نوو دێ هەڤڕك بیت د خولا كوردستانێ دا، ئەڤ چەندە ژی ژ لایەكێ ڤە ژ پێخەمەت پێشخستنا گەنجێن دەڤەرێ یە، ژ لایەكێ دی ڤە ژبەر ئاریشە و ئاستەنگێن دارایی یێن یانەیێ یە، ژبەركو هەتا نوكە یانە خودان چ داهاتەكێ جێگیر نینە.
ناڤبری گۆتژی : بۆ تەمامنەبوونا كارێن یاریگەهێ مە سەرەدانا جهێن پەیوەندیدار كریە، د بەرسڤا مە دا هاتیە دیاركرن كو كار د قووناغێن دووماهیێ دایە و گەشبینن دێ ب جوانترین شێوە بۆ خولێ بەرهەڤبیت، ئەم وەكو هەر یانەیەكا دی یا كوردستانی ب یاریگەها خوە شادبین.
فەهمی فازل گۆت ژی: پێشتر سەخبیرییا یاریگەهێ كارتیكرن ل سەر راهێنان و ئامادەكاریێن یانیەێ كربوونە و نەبوونا داهاتەكێ جێگیر ئاستەنگا هەرە مەزنە ل هەمبەر بڕێڤەبرنا كارێن یانەیێ و دابینكرنا پێدڤیێن یاریزانان، ب هیمەتا جەماوەرێ دەڤەرێ، كارگێریێ، و یاریزانان، ئەم دێ د بەرهەڤین بۆ دەستپێكرنا خولێ.
