قایمقامێ شنگالێ دووماھی ھوشداری دا حوکمەتا عیراقێ
ئەڤرۆ، سالار دۆسکی:
قائیمقامێ شنگالێ دووماھی ھوشداری دا حوکمەتا عیراقێ ھەکە چارەکێ بۆ خەلکێ شنگالێ ل وەرزێ زڤستانێ نەبین دێ ب ئێکجاری خوە ژ ئیدارا بەغدا ڤەکێشن و دێ ھێنە سەر ب ھەرێما کوردستانێ ڤە.
مەحما خەلیل، قایمقامێ قەزا شنگال، ئەڤرۆ سپێدێ ل ئاڤاھیێ نڤسینگەھا جڤاتا نوونەرێن عیراقێ ل دھۆکێ د پرێس کۆنفرانسەکی دا دیار کر کو ژیانا خەلکێ شنگالێ ڤێ زڤستانێ گەلەک یا نەخوەش و گرانە ل کەمپان و د ناڤ ھەیکەلان دا، پێدڤی یە حوکمەتا بەغدا ب ئەرکێ خوە رابیت و ئەو ھێزێن نەقانوونی ل شنگالێ نەمینن، دا خەلک ڤەگەڕیتە سەر جە و وارێن خوە، گازیا خوە دگەھینە UN و ھێزێن ھەڤپەیمانان کو مە ترسی ل سەر خەلکێ شنگال ھەیە، دیسا شنگال گرێدایە ب ماددێ 140 ڤە و ئەڤ مادە دێ ئاریشا ڤی خەلکی چارەسەرکەت.
قایمقامێ شنگالێ ئاماژە دا وێ چەندێ کو کێشا شنگالێ بوویە کێشەکا جیھانی یا مرۆڤایەتی، گازیا خوە دگەھینە سەرکردێ نەتەوا کورد مەسعود بارزانی کو د ھەوارا خەلکێ شنگال بھێت کا چەوا ل رۆژێن سەخت و دژوار د ھەوار ڤی خەلکی ھاتیە، چونکی مەترسیەکا مەزن ل سەر خەلکێ شنگال ھەیە.
مەحما خەلیلی ئاشکرا کر کو دێ شاندەکێ ئیدرا شنگالێ سەرەدانا حوکمەتا خوەجھی یا پارێزگەھا نەینەوا کەت و دیسا دێ شاندەک سەرەدانا بەغدا کەت و ھەکە داخوازیێن خەلکێ شنگالێ نەھێنە بجھئینان دێ پێرابوونێن دستووری و قانوونی گرنە بەر و گۆت: “خەلکێ شنگالێ دڤێت ڤەگەڕنە سەر ب ھەرێما کوردستانێ ڤە ب رێیا ماددێ 140 و داخواز دکەین ھەموو پشتەڤانیا مە بکەن”.
